sharif-zada

suno kal tumheñ ham ne madras cafe meñ

aubāsh logoñ ke hamrāh dekhā

vo sab laḌkiyāñ bad-chalan thiiñ jinheñ tum

salīqe se kaafī ke cup de rahe the

bahut fuhsh aur mubtazil naach thā vo

ki jis ke recordoñ kī ghaTiyā dhunoñ par

thiraktī machaltī huī laḌkiyoñ ne

tumheñ apnī bāhoñ kī jannat meñ rakkhā

bahut dukh huā

tum ne hotel meñ kamra kirā.e pe le kar

un aubāsh logoñ aur un laḌkiyoñ ke hujūm-e-tarab meñ

ga.ī rut tak jashn-e-sahbā manāyā

bahut dukh huā ḳhāndānī sharāfat

buzurgoñ kī bāñkī sajīlī vajāhat ko

tum ne sar-e-ām yuuñ rauñd Daalā

salīqa jo hotā tumheñ laġhzishoñ kā

to apne buzurgoñ kī mānind tum bhī

gharoñ meñ kanīzoñ se pahlū sajāte

pa.e ishrat-e-dil havelī meñ har shab

kabhī raqs hotā kabhī jaam chalte

kisī māh-ruḳh par dil-o-jāñ luTāte

salīqa jo hotā tumheñ laġhzishoñ kā

to yuuñ ḳhāndānī sharāfat vajāhat

na miTTī meñ miltī na badnām hotī

suno kal tumhein hum ne madras cafe mein

aubash logon ke hamrah dekha

wo sab laDkiyan bad-chalan thin jinhen tum

saliqe se kafi ke cup de rahe the

bahut fuhsh aur mubtazil nach tha wo

ki jis ke recordon ki ghaTiya dhunon par

thirakti machalti hui laDkiyon ne

tumhein apni bahon ki jannat mein rakkha

bahut dukh hua

tum ne hotel mein kamra kirae pe le kar

un aubash logon aur un laDkiyon ke hujum-e-tarab mein

gai rut tak jashn-e-sahba manaya

bahut dukh hua KHandani sharafat

buzurgon ki banki sajili wajahat ko

tum ne sar-e-am yun raund Dala

saliqa jo hota tumhein laghzishon ka

to apne buzurgon ki manind tum bhi

gharon mein kanizon se pahlu sajate

pae ishrat-e-dil haweli mein har shab

kabhi raqs hota kabhi jam chalte

kisi mah-ruKH par dil-o-jaan luTate

saliqa jo hota tumhein laghzishon ka

to yun KHandani sharafat wajahat

na miTTi mein milti na badnam hoti