14-August

kahāñ TuuTī haiñ zanjīreñ hamārī

kahāñ badlī haiñ taqrīreñ hamārī

vatan thā zehn meñ zindāñ nahīñ thā

chaman ḳhvāboñ kā yuuñ vīrāñ nahīñ thā

bahāroñ ne diye vo daaġh ham ko

nazar aatā hai maqtal baaġh ham ko

gharoñ ko chhoḌ kar jab ham chale the

hamāre dil meñ kyā kyā valvale the

ye sochā thā hamārā raaj hogā

sar-e-mehnat-kashāñ par taaj hogā

na lūTegā koī mehnat kisī kī

milegī sab ko daulat zindagī kī

na chāteñgī hamārā ḳhuuñ mashīneñ

baneñgī rashk-e-jannat ye zamīneñ

koī gauhar koī aadam na hogā

kisī ko rahzanoñ kā ġham na hogā

luTī har-gām par ummīd apnī

moharram ban ga.ī har iid apnī

musallat hai saroñ par raat ab tak

vahī hai sūrat-e-hālāt ab tak

kahan TuTi hain zanjiren hamari

kahan badli hain taqriren hamari

watan tha zehn mein zindan nahin tha

chaman KHwabon ka yun viran nahin tha

bahaaron ne diye wo dagh hum ko

nazar aata hai maqtal bagh hum ko

gharon ko chhoD kar jab hum chale the

hamare dil mein kya kya walwale the

ye socha tha hamara raj hoga

sar-e-mehnat-kashan par taj hoga

na luTega koi mehnat kisi ki

milegi sab ko daulat zindagi ki

na chatengi hamara KHun mashinen

banengi rashk-e-jannat ye zaminen

koi gauhar koi aadam na hoga

kisi ko rahzanon ka gham na hoga

luTi har-gam par ummid apni

moharram ban gai har id apni

musallat hai saron par raat ab tak

wahi hai surat-e-haalat ab tak