haji-baba

purānī baat hai

lekin ye anhonī sī lagtī hai

sunā hai jab kabhī shahr-e-sabā ke hājī-bābā

apne shāgirdoñ ko dars-e-āḳhirī dete

saroñ par un ke dastār-e-fazīlat bāñdhte

kaale amāmoñ meñ sab hī shāgird saf-basta khaḌe

ye ahd karte the

ḳhudāvandā

hamāre ilm meñ to ḳhair-o-barkat de

hameñ taufīq de ham hājī-bābā kī tarah

shahr-e-sabā ke chaar konoñ meñ na.e maktab banā.eñ

dars-gāhoñ kī binā Dāleñ

sunā hai hājī-bābā

apne shāgirdoñ ko chaar hissoñ meñ jab taqsīm karte to

zamīñ ke chaar konoñ se sadā-e-marhabā aatī

har ik sū

mushk kī ḳhushbū fazā meñ phail sī jaatī

bahut din ba.ad phir aisā huā thā hājī-bābā ne

zamīñ ke chaar konoñ se dhuāñ uThte hue dekhā

jale harfoñ kī ruuh mātam-kunāñ

shahr-e-sabā meñ muddatoñ phirtī rahī tanhā

sunā hai phir kabhī

shahr-e-sabā ke hājī-bābā ne dar-e-maktab nahīñ kholā

kisī par koī kaalā amāma phir nahīñ bāñdhā

purani baat hai

lekin ye anhoni si lagti hai

suna hai jab kabhi shahr-e-saba ke haji-baba

apne shagirdon ko dars-e-aKHiri dete

saron par un ke dastar-e-fazilat bandhte

kale amamon mein sab hi shagird saf-basta khaDe

ye ahd karte the

KHudawanda

hamare ilm mein to KHair-o-barkat de

hamein taufiq de hum haji-baba ki tarah

shahr-e-saba ke chaar konon mein nae maktab banaen

dars-gahon ki bina Dalen

suna hai haji-baba

apne shagirdon ko chaar hisson mein jab taqsim karte to

zamin ke chaar konon se sada-e-marhaba aati

har ek su

mushk ki KHushbu faza mein phail si jati

bahut din baad phir aisa hua tha haji-baba ne

zamin ke chaar konon se dhuan uThte hue dekha

jale harfon ki ruh matam-kunan

shahr-e-saba mein muddaton phirti rahi tanha

suna hai phir kabhi

shahr-e-saba ke haji-baba ne dar-e-maktab nahin khola

kisi par koi kala amama phir nahin bandha