hain KHwab mein hunuz

vo ik shai

ki jis ke liye paak tīnat buzurgoñ ne

apne badan zehn ke saare jauhar gañvā.e

lahū ke guhar

ḳhār-zāroñ kī pahnā.iyoñ meñ luTā.e

vo ik shai

jise un jiyāle buzurgoñ ne jeb-o-garebāñ

dil-o-jāñ se bhī baḌh ke samjhā

jo hāsil huī to

abhī bām-o-dar se siyah-rāt lipTī huī thī

safar kī thakan yā

girāñ-bārī umr ne

un ke a.asāb ko muzmahil kar diyā thā

unhoñ ne ye sochā

ḳhudā jaane sūraj nikalne talak kyā se kyā ho

hasīñ be-bahā shai ke haqdār

un ke javāñ-sāl bachche haiñ

us kī hifāzat vahī kar sakeñge

javāñ-sāl bachche

abhī bistar-e-istirāhat pe so.e hue the

jagā.e ga.e

sub.h-e-kāzib kī dhuñdlāhaToñ meñ

chamaktī huī vo hasīñ shai

virāsat meñ un ko milī thī

magar sab ne dekhā thā sūraj nikalne pe

un sust-o-chālāk bachchoñ

ke hāthoñ meñ mahfūz-o-qīmtī shai

ba-tadrīj apnī chamak kho rahī thī

tilism-e-tasavvur nahīñ ye haqīqat hai

vo be-bahā shai

ki jis ke liye

har sa.ūbat gavārā hai

manzil nahīñ

justujū hai

vo ik chiiz jis par nichhāvar

jiyāloñ kā raushan lahū hai

faqat rañg-o-bū hī nahīñ

gulistāñ kī humaktī huī aarzū hai

har ik naf.a jaa.ez nuqsān ke batn se hai

unhoñ ne jo hāsil kiyā vo ziyāda thā

aur āḳhir shab ke kuchh ḳhvāb ko jo gañvāyā

vo kam thā

isī nā-tanāsub husūl-o-ḳhasāra kā radd-e-amal hai

ki manzil kī āġhosh meñ bhī

unheñ sukh nahīñ hai

wo ek shai

ki jis ke liye pak tinat buzurgon ne

apne badan zehn ke sare jauhar ganwae

lahu ke guhar

KHar-zaron ki pahnaiyon mein luTae

wo ek shai

jise un jiyale buzurgon ne jeb-o-gareban

dil-o-jaan se bhi baDh ke samjha

jo hasil hui to

abhi baam-o-dar se siyah-raat lipTi hui thi

safar ki thakan ya

giran-bari umr ne

un ke aasab ko muzmahil kar diya tha

unhon ne ye socha

KHuda jaane suraj nikalne talak kya se kya ho

hasin be-baha shai ke haqdar

un ke jawan-sal bachche hain

us ki hifazat wahi kar sakenge

jawan-sal bachche

abhi bistar-e-istirahat pe soe hue the

jagae gae

subh-e-kazib ki dhundlahaTon mein

chamakti hui wo hasin shai

wirasat mein un ko mili thi

magar sab ne dekha tha suraj nikalne pe

un sust-o-chaalak bachchon

ke hathon mein mahfuz-o-qimti shai

ba-tadrij apni chamak kho rahi thi

tilism-e-tasawwur nahin ye haqiqat hai

wo be-baha shai

ki jis ke liye

har saubat gawara hai

manzil nahin

justuju hai

wo ek chiz jis par nichhawar

jiyalon ka raushan lahu hai

faqat rang-o-bu hi nahin

gulistan ki humakti hui aarzu hai

har ek nafa jaez nuqsan ke batn se hai

unhon ne jo hasil kiya wo ziyaada tha

aur aaKHir shab ke kuchh KHwab ko jo ganwaya

wo kam tha

isi na-tanasub husul-o-KHasara ka radd-e-amal hai

ki manzil ki aaghosh mein bhi

unhen sukh nahin hai