siDhiyan

chaḌhtī kahīñ kahīñ se utartī haiñ sīḌhiyāñ

jaane kahāñ kahāñ se guzartī haiñ sīḌhiyāñ

yādoñ ke jhilmilāte sitāre liye hue

maazī kī kahkashāñ se utartī haiñ sīḌhiyāñ

letī haiñ yuuñ safar meñ musāfir kā imtihāñ

hamvār rāstoñ pe ubhartī haiñ sīḌhiyāñ

kartī haiñ sar ġhurūr kā nīche utaar kar

pastī kā sar buland bhī kartī haiñ sīḌhiyāñ

tārīkiyoñ ko oḌh ke sotī haiñ rāt-bhar

sūraj kī raushnī meñ nikhartī haiñ sīḌhiyāñ

hiltī nahīñ hilā.e se sābit-qadam tale

mahkeñ agar qadam to bahaktī haiñ sīḌhiyāñ

mimbar pe chaḌh ke baiThtī haiñ vā.izoñ ke saath

rindoñ se chheḌ-chhāḌ bhī kartī haiñ sīḌhiyāñ

jab koī haal pūchhne aa.e na muddatoñ

andar se TūT-phūT ke martī haiñ sīḌhiyāñ

yādoñ ke phūñk phūñk ke rakhne paḌe qadam

zaḳhmoñ se dil ke jab bhī sañvartī haiñ sīḌhiyāñ

letī haiñ baḌh ke sab ke qadam to lagā mujhe

tanhā.ī ke azaab se Dartī haiñ sīḌhiyāñ

yuuñ dil meñ terī baat utartī hai 'ḳhvāh-maḳhvāh'

gahre kueñ meñ jaise utartī haiñ sīḌhiyāñ

chaDhti kahin kahin se utarti hain siDhiyan

jaane kahan kahan se guzarti hain siDhiyan

yaadon ke jhilmilate sitare liye hue

mazi ki kahkashan se utarti hain siDhiyan

leti hain yun safar mein musafir ka imtihan

hamwar raston pe ubharti hain siDhiyan

karti hain sar ghurur ka niche utar kar

pasti ka sar buland bhi karti hain siDhiyan

tarikiyon ko oDh ke soti hain raat-bhar

suraj ki raushni mein nikharti hain siDhiyan

hilti nahin hilae se sabit-qadam tale

mahken agar qadam to bahakti hain siDhiyan

mimbar pe chaDh ke baiThti hain waizon ke sath

rindon se chheD-chhaD bhi karti hain siDhiyan

jab koi haal puchhne aae na muddaton

andar se TuT-phuT ke marti hain siDhiyan

yaadon ke phunk phunk ke rakhne paDe qadam

zaKHmon se dil ke jab bhi sanwarti hain siDhiyan

leti hain baDh ke sab ke qadam to laga mujhe

tanhai ke azab se Darti hain siDhiyan

yun dil mein teri baat utarti hai 'KHwah-maKHwah'

gahre kuen mein jaise utarti hain siDhiyan