۲۷ دسمبر

افق پہ دور کوئی چاند جگمگا اٹھا

نئے لباس میں اک جسم مسکرا اٹھا

چمک اٹھیں ہیں نئے منظروں میں کچھ شکلیں

سجی ہوئی ہیں کچھ ہونٹوں پہ قہقہوں کی صفیں

مہکتے پیرہنوں کے حصار میں کوئی

کسی کی نرم ہتھیلی میں رنگ بھرتا ہے

ہوائیں خوشبوئیں پھیلا رہی ہیں چاروں طرف

بلندیوں پہ کئی چاند مسکراتے ہیں

سبھی گزرتے ہوئے لمحے گنگناتے ہیں

تمام راستے ہیں روشنی میں ڈوبے ہوئے

یہاں سے دور مگر اک مقام ایسا ہے

کہ جہاں

سکون شب کی اسیری میں ایک سورج ہے

جو تیرگی کی سلاخوں سے سر ٹکائے ہوئے

سبھی بدلتے ہوئے منظروں پہ ہنستا ہے