intizar ke baad

uñgliyoñ meñ dabī huī cigarette kā

ek aur kash lene se pahle maiñ ne

balcony meñ jhāñkā

vo ab bhī nahīñ aayā thā

kamre meñ chand saa.at ke liye

be-his-o-harakat khaḌā rahnā

ajiib sā lagā aur tab

maiñ ne sulagtī huī cigarette ko

jis ke abhī ka.ī aur kash liye jā sakte the

chhoTī sī gol mez par burī tarah se masal Daalā

dāyāñ haath tezī se ghūmā aur

kāñch kā ḳhūbsūrat gilās mez se uchhal kar

farsh par girā aur chaknā-chūr ho gayā

aur us se pahle ki maiñ

nokīlī kirchiyoñ ko chunñe kī cheshTā meñ

apne bojhal sharīr ko kursī se uThātā

vo achānak darvāza khol kar

kamre meñ hāzir ho gayā

pashemānī ke qatre

merī jabīñ par saaf jhalak uThe the

lekin mujhe mahsūs huā

ki maiñ unheñ rūmāl meñ jazb kar lene kī jur.at bhī

kho chukā thā

ungliyon mein dabi hui cigarette ka

ek aur kash lene se pahle main ne

balcony mein jhanka

wo ab bhi nahin aaya tha

kamre mein chand saat ke liye

be-his-o-harakat khaDa rahna

ajib sa laga aur tab

main ne sulagti hui cigarette ko

jis ke abhi kai aur kash liye ja sakte the

chhoTi si gol mez par buri tarah se masal Dala

dayan hath tezi se ghuma aur

kanch ka KHubsurat gilas mez se uchhal kar

farsh par gira aur chakna-chur ho gaya

aur us se pahle ki main

nokili kirchiyon ko chunne ki cheshTa mein

apne bojhal sharir ko kursi se uThata

wo achanak darwaza khol kar

kamre mein hazir ho gaya

pashemani ke qatre

meri jabin par saf jhalak uThe the

lekin mujhe mahsus hua

ki main unhen rumal mein jazb kar lene ki jurat bhi

kho chuka tha