band kamra

dekho pardoñ ko achchhī tarah khīñch duur

aur sab khiḌkiyāñ band kar do

aur us band kamre se bāhar niklo

us meñ bosīda sofoñ pe ik moTā kapḌā chaḌhā kar

tum ne un ko is andāz se rakh diyā hai

ki ab daa.eñ kone meñ

ukhḌī safedī pe sīlan ke dhabbe

kam-o-besh nazroñ se poshīda haiñ

aur baa.eñ taraf

TuuTe Dibboñ

purāne ḳhatoñ

zañg-ālūd TuuTī paleToñ

aur bosīda pinjroñ ke ik Dher ko

tum ne ik lambī chauḌī sī chādar se

achchhī tarah Dhak diyā hai

aur ab baaqī kamra

baḌā sāf-suthrā nazar aa rahā hai

dekho TuuTī huī carnas ko bhī

ik shoḳh kapḌe se Dhak kar

us par vo zar-sham.eñ jalā do

ki jin kī sisaktī huī raushnī meñ

tumhāre ḳhad-o-ḳhāl ma.alūm hote haiñ mauzūñ

aur kone meñ rakhe hue

chhoTe recordplayer par havā disk rakh do

ki jis meñ purānī sī ek lai meñ

bas chand lafzoñ kī takrār hai

dekho us band kamre se bāhar na niklo

kabhī bhuul kar bhī

barābar ke kamre meñ hargiz na jaao

kyuuñ ki vo sāl-hā-sāl se band hai

ye bhī mumkin hai

zahrīle kīḌe-makoḌe vahāñ pal rahe hoñ

ye bhī mumkin hai

ab tak vo bhūtoñ kā ghar ban chukā hai

dekho us band kamre se bāhar na niklo

kyuuñ ki mumkin hai ab tak

vo zaḳhmī barahna band

baaġh ke ek goshe meñ dam toḌte hoñ

haañ agar ho sake to kisī se kaho

un ke ḳhūñ-gashta jismoñ pe

zartār lafzoñ kī poshāk Dhak kar

un ko bāhar paḌī kursiyoñ par biThā de

tā ki us raah se koī guzre

to kah de ki sab Thiik hai

tum magar phir bhī sab khiḌkiyāñ band rakho

aur pardoñ ko achchhī tarah khīñch do

aur us band kamre se bāhar na niklo

dekho us band kamre se bāhar na niklo

dekho pardon ko achchhi tarah khinch dur

aur sab khiDkiyan band kar do

aur us band kamre se bahar niklo

us mein bosida sofon pe ek moTa kapDa chaDha kar

tum ne un ko is andaz se rakh diya hai

ki ab daen kone mein

ukhDi safedi pe silan ke dhabbe

kam-o-besh nazron se poshida hain

aur baen taraf

TuTe Dibbon

purane KHaton

zang-alud TuTi paleTon

aur bosida pinjron ke ek Dher ko

tum ne ek lambi chauDi si chadar se

achchhi tarah Dhak diya hai

aur ab baqi kamra

baDa saf-suthra nazar aa raha hai

dekho TuTi hui carnas ko bhi

ek shoKH kapDe se Dhak kar

us par wo zar-shamen jala do

ki jin ki sisakti hui raushni mein

tumhaare KHad-o-KHal malum hote hain mauzun

aur kone mein rakhe hue

chhoTe recordplayer par hawa disk rakh do

ki jis mein purani si ek lai mein

bas chand lafzon ki takrar hai

dekho us band kamre se bahar na niklo

kabhi bhul kar bhi

barabar ke kamre mein hargiz na jao

kyun ki wo sal-ha-sal se band hai

ye bhi mumkin hai

zahrile kiDe-makoDe wahan pal rahe hon

ye bhi mumkin hai

ab tak wo bhuton ka ghar ban chuka hai

dekho us band kamre se bahar na niklo

kyun ki mumkin hai ab tak

wo zaKHmi barahna band

bagh ke ek goshe mein dam toDte hon

han agar ho sake to kisi se kaho

un ke KHun-gashta jismon pe

zartar lafzon ki poshak Dhak kar

un ko bahar paDi kursiyon par biTha de

ta ki us rah se koi guzre

to kah de ki sab Thik hai

tum magar phir bhi sab khiDkiyan band rakho

aur pardon ko achchhi tarah khinch do

aur us band kamre se bahar na niklo

dekho us band kamre se bahar na niklo