azal-abad

apnā to abad hai kunj-e-marqad

jab jism supurd-e-ḳhāk ho jaa.e

marqad bhī nahīñ vo āḳhirī saañs

jab qissa-e-zīst paak ho jaa.e

vo saañs nahīñ shikast-e-ummīd

jab dāman-e-dil hī chaak ho jaa.e

ummīd nahīñ bas ek lamha

jo ātish-e-ġham se ḳhaak ho jaa.e

hastī kī abad-gah-e-qazā meñ

kuchh farq nahīñ fanā baqā meñ

ḳhākistar-e-ḳhvāb shola-e-ḳhvāb

ye apnā azal hai vo abad hai

vo shola to kab kā mar chukā hai

ye jism ik nāsh-e-be-lahad hai

martī hai hayāt lamha lamha

har saañs ik zindagī kī had hai

rūhoñ ko davām dene vaalo

jismoñ kī sabīl kuchh nikālo

shola koī musta.ār de do

yā laash ko ab mazār de do

apna to abad hai kunj-e-marqad

jab jism supurd-e-KHak ho jae

marqad bhi nahin wo aaKHiri sans

jab qissa-e-zist pak ho jae

wo sans nahin shikast-e-ummid

jab daman-e-dil hi chaak ho jae

ummid nahin bas ek lamha

jo aatish-e-gham se KHak ho jae

hasti ki abad-gah-e-qaza mein

kuchh farq nahin fana baqa mein

KHakistar-e-KHwab shola-e-KHwab

ye apna azal hai wo abad hai

wo shola to kab ka mar chuka hai

ye jism ek nash-e-be-lahad hai

marti hai hayat lamha lamha

har sans ek zindagi ki had hai

ruhon ko dawam dene walo

jismon ki sabil kuchh nikalo

shola koi mustaar de do

ya lash ko ab mazar de do