ek nazm

chhuTpuTe ke ġhurfe meñ

lamhe ab bhī milte haiñ

sub.h ke dhundalke meñ

phuul ab bhī khilte haiñ

ab bhī kohsāroñ par

sar-kashīda hariyālī

pattharoñ kī dīvāreñ

toḌ kar nikaltī hai

ab bhī āb-zāroñ par

kashtiyoñ kī sūrat meñ

ziist kī tavānā.ī

zāviye badaltī hai

ab bhī ghaas ke maidāñ

shabnamī sitāroñ se

mere ḳhāk-dāñ par bhī

āsmāñ sajāte haiñ

ab bhī khet gandum ke

tez dhuup meñ tap kar

is ġharīb dhartī ko

zar-fishāñ banāte haiñ

saaye ab bhī chalte haiñ

sūraj ab bhī Dhaltā hai

sub.heñ ab bhī raushan haiñ

rāteñ ab bhī kaalī haiñ

zehn ab bhī chaTyal haiñ

rūheñ ab bhī banjar haiñ

jism ab bhī nañge haiñ

haath ab bhī ḳhālī haiñ

ab bhī sabz fasloñ meñ

zindagī ke rakhvāle

zard zard chehroñ par

ḳhaak oḌhe rahte haiñ

ab bhī un kī taqdīreñ

munqalib nahīñ hotīñ

munqalib nahīñ hoñgī

kahne vaale kahte haiñ

gardishoñ kī rānā.ī

aam hī nahīñ hotī

apne roz-e-avval kī

shaam hī nahīñ hotī

chhuTpuTe ke ghurfe mein

lamhe ab bhi milte hain

subh ke dhundalke mein

phul ab bhi khilte hain

ab bhi kohsaron par

sar-kashida hariyali

pattharon ki diwaren

toD kar nikalti hai

ab bhi aab-zaron par

kashtiyon ki surat mein

zist ki tawanai

zawiye badalti hai

ab bhi ghas ke maidan

shabnami sitaron se

mere KHak-dan par bhi

aasman sajate hain

ab bhi khet gandum ke

tez dhup mein tap kar

is gharib dharti ko

zar-fishan banate hain

saye ab bhi chalte hain

suraj ab bhi Dhalta hai

subhen ab bhi raushan hain

raaten ab bhi kali hain

zehn ab bhi chaTyal hain

ruhen ab bhi banjar hain

jism ab bhi nange hain

hath ab bhi KHali hain

ab bhi sabz faslon mein

zindagi ke rakhwale

zard zard chehron par

KHak oDhe rahte hain

ab bhi un ki taqdiren

munqalib nahin hotin

munqalib nahin hongi

kahne wale kahte hain

gardishon ki ranai

aam hi nahin hoti

apne roz-e-awwal ki

sham hi nahin hoti