usne mujhse kaha tha

malgajī arz-e-ġham zard sā āsmāñ

aur ufuq-tā-ufuq aur shafaq-dar-shafaq

surma.ī bādaloñ meñ udāsī ke rañg

us ke kamre ke māhaul meñ

ik malāl-āfrīñ kaifiyat

us kī nargis sī āñkhoñ meñ larzāñ hinā.ī

nishāñ

al-amāñ

is kā ġhuncha-dahan

adh-khule phuul sā

us ke ruḳhsār par

surḳhiyoñ kī phaban

aur burrāq hāthoñ pe rakhī huī zindagī

vo mirī zindagī

dard ke silsile

phuul afsurda kaliyāñ niDhāl

khañDaroñ kī misāl

baam ujḌe hue

hairatoñ ke safar

hijratoñ ke nagar

aur be-rañg afsurda pazhmurda atrāf kā shor-o-shar

us kī yādoñ ke dukh

us kī duurī ke ġham

nā-rasā.ī ke armān

aur karb kī dhuñd meñ

us kī hijrat ke dukh

maiñ jo palTūñ to maazī kī bezāriyāñ

baal khole hue mātamī rañg meñ par-fishāñ

ek barzaḳh kī vo raat thī

gūñjtī raat thī

jabki kamre meñ sab jam.a the

us ne mujh se kahā

chalo aaj bāhar kā mausam bahut dil-nashīñ hai

malgaji arz-e-gham zard sa aasman

aur ufuq-ta-ufuq aur shafaq-dar-shafaq

surmai baadalon mein udasi ke rang

us ke kamre ke mahaul mein

ek malal-afrin kaifiyat

us ki nargis si aankhon mein larzan hinai

nishan

al-aman

is ka ghuncha-dahan

adh-khule phul sa

us ke ruKHsar par

surKHiyon ki phaban

aur burraq hathon pe rakhi hui zindagi

wo meri zindagi

dard ke silsile

phul afsurda kaliyan niDhaal

khanDaron ki misal

baam ujDe hue

hairaton ke safar

hijraton ke nagar

aur be-rang afsurda pazhmurda atraf ka shor-o-shar

us ki yaadon ke dukh

us ki duri ke gham

na-rasai ke arman

aur karb ki dhund mein

us ki hijrat ke dukh

main jo palTun to mazi ki bezariyan

baal khole hue matami rang mein par-fishan

ek barzaKH ki wo raat thi

gunjti raat thi

jabki kamre mein sab jama the

us ne mujh se kaha

chalo aaj bahar ka mausam bahut dil-nashin hai