aaina

maiñ apnī sūrat ko ā.īne meñ

huuñ dekh kar aaj saḳht hairāñ

vo ḳhūb-sūrat hiran sī āñkheñ

kahāñ ga.iiñ kyā huā hai un ko

vahāñ to ab do gaḌhe haiñ baaqī

muhīb sunsān aur vīrāñ

gulāb se surḳh hoñT mere

ḳhajil the yāqūt-o-la.al jin se

jamā huā un pe dekhtī huuñ

bahut se logoñ kā ḳhūn-e-nāhaq

ye merā piilā sā zard chehra

nahīñ hai ik ḳhuuñ kī buuñd jis meñ

ye murdanī dekh kar mujhe to

baḌā hī ḳhauf aa rahā hai ḳhud se

maiñ sochtī huuñ ye bholī duniyā

hai kitnī ma.asūm aur nādāñ

ki phir bhī mujh ko samajh rahī hai

hasīn aur nāznīn ab tak

magar nahīñ maiñ to vāqa.ī huuñ

bahut hasīn aur ḳhūb-sūrat

ye aa.ina jhuuT boltā hai

daroġh-go hai

maiñ toḌ dūñgī ise abhī phir

kabhī na dekhūñgī is meñ chehra

sakhī vo ā.īna mujh ko lā de

jo mujh ko ik baar phir dikhā de

mirī vo pahlī sī pyārī sūrat

main apni surat ko aaine mein

hun dekh kar aaj saKHt hairan

wo KHub-surat hiran si aankhen

kahan gain kya hua hai un ko

wahan to ab do gaDhe hain baqi

muhib sunsan aur viran

gulab se surKH honT mere

KHajil the yaqut-o-lal jin se

jama hua un pe dekhti hun

bahut se logon ka KHun-e-nahaq

ye mera pila sa zard chehra

nahin hai ek KHun ki bund jis mein

ye murdani dekh kar mujhe to

baDa hi KHauf aa raha hai KHud se

main sochti hun ye bholi duniya

hai kitni masum aur nadan

ki phir bhi mujh ko samajh rahi hai

hasin aur naznin ab tak

magar nahin main to waqai hun

bahut hasin aur KHub-surat

ye aaina jhuT bolta hai

darogh-go hai

main toD dungi ise abhi phir

kabhi na dekhungi is mein chehra

sakhi wo aaina mujh ko la de

jo mujh ko ek bar phir dikha de

meri wo pahli si pyari surat