qabristan mein KHud-kalami

mire paas

maut ke bahut se options haiñ

maiñ kisī bhī vaqt kahīñ bhī maarā jā saktā huuñ

mobile chhīnñe vaalā naujavān

mujhe Taḳhne par golī maar saktā hai

police ke naake par na rukne kī pādāsh meñ

mujhe thāne ke andar maarā jā saktā hai

raat ke pichhle pahar

ghar meñ ghusne vaalā Daaku kaalī jeb hone ke jurm meñ

mujhe bandūq ke hiT-mark se halāk kar saktā hai

jī pī fund ke husūl kī ḳhātir

maiñ

a-g office kī sīḌhiyāñ chaḌhte chaḌhte

dil ke daure se bhī mar saktā huuñ

aur

kisī gunjān market yā masjid meñ hone vaale dhamāke meñ bā-āsānī

shahādat pā saktā huuñ

ab to

ġhurbat kī lakīr se laTak kar

mere bhuuk se marne ke imkānāt bhī paidā hone lage haiñ

agarche jañg meñ kaam aane kā zamāna guzar chukā hai

magar ba.az muqaddas dushman

merī maut ke evaz jannat ke talabgār haiñ

merī samājī maut se ab kisī ko koī fā.eda nahīñ

hattā ki mujhe bhī nahīñ

magar plot mafiyā ke alāva zaḳhīra-andoz aur saTTe-bāz

merī maut ke muntazir haiñ

aur

unhoñ ne mujhe be-tauqīr kar ke

saḌak par merī ḳhud-sozī kā rāsta kushāda kar diyā hai

jamhūriyat aur insānī huqūq kī bāzyāft ke liye marnā merā ḳhvāb thā

magar

bachchoñ kī fēseñ adā karne ke liye aur Time lagāne ke baa.is

mere paas aisī ayyāshī ke liye vaqt nahīñ

so

maiñ ba-qā.emī hosh-o-havās aise farsūda nazriyāt ko mustarad kartā huuñ

raat der ga.e

ghar lauTte hue

rāh-gīrī maut maare jaanā merī hargiz tarjīh nahīñ

magar us meñ harj bhī kyā hai

ki us ke evaz sarkārī ḳhazāne se pāñch laakh rūpa.e milte haiñ

maiñ

zinda rahne ke imkānāt se taqrīban mahrūm kiyā jā chukā huuñ

magar na-jāne kyuuñ

maiñ zinda rahnā chāhtā huuñ

mere pas

maut ke bahut se options hain

main kisi bhi waqt kahin bhi mara ja sakta hun

mobile chhinne wala naujawan

mujhe TaKHne par goli mar sakta hai

police ke nake par na rukne ki padash mein

mujhe thane ke andar mara ja sakta hai

raat ke pichhle pahar

ghar mein ghusne wala Daku kali jeb hone ke jurm mein

mujhe banduq ke hiT-mark se halak kar sakta hai

ji pi fund ke husul ki KHatir

main

a-g office ki siDhiyan chaDhte chaDhte

dil ke daure se bhi mar sakta hun

aur

kisi gunjaan market ya masjid mein hone wale dhamake mein ba-asani

shahadat pa sakta hun

ab to

ghurbat ki lakir se laTak kar

mere bhuk se marne ke imkanat bhi paida hone lage hain

agarche jang mein kaam aane ka zamana guzar chuka hai

magar baz muqaddas dushman

meri maut ke ewaz jannat ke talabgar hain

meri samaji maut se ab kisi ko koi faeda nahin

hatta ki mujhe bhi nahin

magar plot mafiya ke alawa zaKHira-andoz aur saTTe-baz

meri maut ke muntazir hain

aur

unhon ne mujhe be-tauqir kar ke

saDak par meri KHud-sozi ka rasta kushada kar diya hai

jamhuriyat aur insani huquq ki bazyaft ke liye marna mera KHwab tha

magar

bachchon ki feesen ada karne ke liye aur Time lagane ke bais

mere pas aisi ayyashi ke liye waqt nahin

so

main ba-qaemi hosh-o-hawas aise farsuda nazriyat ko mustarad karta hun

raat der gae

ghar lauTte hue

rah-giri maut mare jaana meri hargiz tarjih nahin

magar us mein harj bhi kya hai

ki us ke ewaz sarkari KHazane se panch lakh rupae milte hain

main

zinda rahne ke imkanat se taqriban mahrum kiya ja chuka hun

magar na-jaane kyun

main zinda rahna chahta hun