KHata-e-buzurgan

purānī baat hai

lekin ye anhonī sī lagtī hai

huā ik baar yuuñ

un ke buzurgoñ ne

zamīñ meñ kuchh nahīñ boyā

faqat añgūr kī beleñ ugā.īñ

aur miTTī ke ghaḌoñ meñ mai banā.ī

raat jab aa.ī

un ke badan nañge the

pahlī baar

mai kā zā.iqa hoñToñ ne chakkhā thā

hikāyat hai

barahna dekh kar apne buzurgoñ ko

javāñ beToñ ne āñkheñ band kar liiñ

aur miTTī ke ghaḌoñ ko toḌ Daalā

sub.h se pahle

zamīñ hamvār kī

aur us meñ aise biij bo.e

jin ke phal paude

kabhī un ke buzurgoñ ke na kaam aa.e

purani baat hai

lekin ye anhoni si lagti hai

hua ek bar yun

un ke buzurgon ne

zamin mein kuchh nahin boya

faqat angur ki belen ugain

aur miTTi ke ghaDon mein mai banai

raat jab aai

un ke badan nange the

pahli bar

mai ka zaiqa honTon ne chakkha tha

hikayat hai

barahna dekh kar apne buzurgon ko

jawan beTon ne aankhen band kar lin

aur miTTi ke ghaDon ko toD Dala

subh se pahle

zamin hamwar ki

aur us mein aise bij boe

jin ke phal paude

kabhi un ke buzurgon ke na kaam aae