آ جا

بن کر نوائے بلبل رنگینئ‌ چمن میں

بن کر بہار گلشن غنچوں کے پیرہن میں

بن کر حسیں تبسم تاروں کی انجمن میں

میری مسرتوں کے رنگین خواب آ جا

دنیائے دل کے مالک ہاں لے حجاب آ جا

دنیائے رنگ و بو میں جان بہار بن کر

ہستی کے زمزموں میں ساز قرار بن کر

صہبائے آتشیں کا رنگیں خمار بن کر

دور شراب بن کر جان شراب آ جا

دنیائے دل کے مالک ہاں بے حجاب آ جا

یہ صبح کی بہاریں یہ شام کے نظارے

نسرین و غنچہ و گل شمس و قمر ستارے

بے کیف ہو گئے ہیں تیرے بغیر پیارے

تاریک جان و دل کے اے ماہتاب آ جا

دنیائے دل کے مالک ہاں بے حجاب آ جا

مفقود ہو گئی ہے قلب و جگر کی راحت

واماندہ روح مضطر آشفتہ ساز فطرت

آ جا کہ دیکھ لے اب بے چین دل کی حالت

اے ساز زندگی کے تار رباب آ جا

دنیائے دل کے مالک ہاں بے حجاب آ جا

آ جا کہ پھر چڑھا لیں جام شباب و مستی

آ جا کہ پھر بسا لیں دنیائے دل کی بستی

آ جا کہ غرق کر دیں الفت میں اپنی ہستی

مفہوم زیست آ جا تعبیر خواب آ جا

دنیائے دل کے مالک ہاں بے حجاب آ جا