aa ja

ban kar navā-e-bulbul rangīnī-e-chaman meñ

ban kar bahār-e-gulshan ġhunchoñ ke pairahan meñ

ban kar hasīñ tabassum tāroñ kī anjuman meñ

merī masarratoñ ke rangīn ḳhvāb aa jā

duniyā-e-dil ke mālik haañ le hijāb aa jā

duniyā-e-rang-o-bū meñ jān-e-bahār ban kar

hastī ke zamzamoñ meñ sāz-e-qarār ban kar

sahbā-e-ātishīñ kā rangīñ ḳhumār ban kar

daur-e-sharāb ban kar jān-e-sharāb aa jā

duniyā-e-dil ke mālik haañ be-hijāb aa jā

ye sub.h kī bahāreñ ye shaam ke nazāre

nasrīn-o-ġhuncha-o-gul shams-o-qamar sitāre

be-kaif ho ga.e haiñ tere baġhair pyāre

tārīk jān-o-dil ke ai māhtāb aa jā

duniyā-e-dil ke mālik haañ be-hijāb aa jā

mafqūd ho ga.ī hai qalb-o-jigar kī rāhat

vāmāñda rūh-e-muztar āshufta sāz-e-fitrat

aa jā ki dekh le ab bechain dil kī hālat

ai sāz-e-zindagī ke tār-e-rabāb aa jā

duniyā-e-dil ke mālik haañ be-hijāb aa jā

aa jā ki phir chaḌhā leñ jām-e-shabāb-o-mastī

aa jā ki phir basā leñ duniyā-e-dil kī bastī

aa jā ki ġharq kar deñ ulfat meñ apnī hastī

mafhūm-e-zīst aa jā tābīr-e-ḳhvāb aa jā

duniyā-e-dil ke mālik haañ be-hijāb aa jā

ban kar nawa-e-bulbul rangini-e-chaman mein

ban kar bahaar-e-gulshan ghunchon ke pairahan mein

ban kar hasin tabassum taron ki anjuman mein

meri masarraton ke rangin KHwab aa ja

duniya-e-dil ke malik han le hijab aa ja

duniya-e-rang-o-bu mein jaan-e-bahaar ban kar

hasti ke zamzamon mein saz-e-qarar ban kar

sahba-e-atishin ka rangin KHumar ban kar

daur-e-sharab ban kar jaan-e-sharab aa ja

duniya-e-dil ke malik han be-hijab aa ja

ye subh ki bahaaren ye sham ke nazare

nasrin-o-ghuncha-o-gul shams-o-qamar sitare

be-kaif ho gae hain tere baghair pyare

tarik jaan-o-dil ke ai mahtab aa ja

duniya-e-dil ke malik han be-hijab aa ja

mafqud ho gai hai qalb-o-jigar ki rahat

wamanda ruh-e-muztar aashufta saz-e-fitrat

aa ja ki dekh le ab bechain dil ki haalat

ai saz-e-zindagi ke tar-e-rabab aa ja

duniya-e-dil ke malik han be-hijab aa ja

aa ja ki phir chaDha len jam-e-shabab-o-masti

aa ja ki phir basa len duniya-e-dil ki basti

aa ja ki gharq kar den ulfat mein apni hasti

mafhum-e-zist aa ja tabir-e-KHwab aa ja

duniya-e-dil ke malik han be-hijab aa ja