wirsa

maiñ bahut ḳhush huuñ ki is darja milī daulat-e-ġham

itnī daulat ki ginī jaa.e na rakkhī jaa.e

aur phir kis ko ḳhabar us kī magar mere sivā

us kā mālik bhī nahīñ koī magar mere sivā

aur daulat bhī ye aisī ki kahīñ besh-bahā

ek ik motī kā hai rañg alag shaan judā

kyuuñ na ho kitne hī sāloñ kī kamā.ī hai ye

sirf merī nahīñ pushtoñ kī kamā.ī hai ye

chhoḌī ajdād ne aulād kī baarī aa.ī

aur aulād bhī aulād ko detī aa.ī

kuchh kamī aa.ī na us meñ kisī mausam kisī saal

be-hisāb ho ke ye baḌhtī rahī baḌhtī hī rahī

maiñ bahut ḳhush huuñ ki is darja milī daulat-e-ġham

mere ajdād meñ bhī mujh sā na thā koī amiir

merī daulat ke muqābil haiñ vo sab log faqīr

maiñ bahut ḳhush huuñ ki is darja milī daulat-e-ġham

bhūltā hī nahīñ maiñ apnī amīrī kā ġhurūr

mere ajdād amiir aur maiñ amiir ibne-amīr

rashk se haa.e magar is pe marā jaatā huuñ

ki na baḌh jaa.e kahīñ rutba-e-aulād-e-amīr

rashk aatā hai bahut un pe nasībe dārad

main bahut KHush hun ki is darja mili daulat-e-gham

itni daulat ki gini jae na rakkhi jae

aur phir kis ko KHabar us ki magar mere siwa

us ka malik bhi nahin koi magar mere siwa

aur daulat bhi ye aisi ki kahin besh-baha

ek ek moti ka hai rang alag shan juda

kyun na ho kitne hi salon ki kamai hai ye

sirf meri nahin pushton ki kamai hai ye

chhoDi ajdad ne aulad ki bari aai

aur aulad bhi aulad ko deti aai

kuchh kami aai na us mein kisi mausam kisi sal

be-hisab ho ke ye baDhti rahi baDhti hi rahi

main bahut KHush hun ki is darja mili daulat-e-gham

mere ajdad mein bhi mujh sa na tha koi amir

meri daulat ke muqabil hain wo sab log faqir

main bahut KHush hun ki is darja mili daulat-e-gham

bhulta hi nahin main apni amiri ka ghurur

mere ajdad amir aur main amir ibne-amir

rashk se hae magar is pe mara jata hun

ki na baDh jae kahin rutba-e-aulad-e-amir

rashk aata hai bahut un pe nasibe darad