aabla

vo raat kitnī ajiib thī

kaT nahīñ rahī thī

ki vaqt hī jaise ruk gayā thā

zabān chup thī

nigāheñ ik dāstān-e-mahrūmī-e-tamannā

sunā rahī thiiñ

bisāt-e-āġhosh bujh ga.ī thī

hamārā hī intizār thā

farsh-e-dil-barī ko

magar ham apnī sharāfat-e-nafs kī

girāñ-bāriyoñ se majbūr ho ga.e the

ḳhud apnī fitrat se

is qadar duur ho ga.e the

ki dil kī āvāz sun na paa.e

lahū kī gardish bhī vaqt ke saath

tham ga.ī thī

ham us ke haq meñ vo aabla the

jo phūTtā hai na sūkhtā hai

wo raat kitni ajib thi

kaT nahin rahi thi

ki waqt hi jaise ruk gaya tha

zaban chup thi

nigahen ek dastan-e-mahrumi-e-tamanna

suna rahi thin

bisat-e-aghosh bujh gai thi

hamara hi intizar tha

farsh-e-dil-bari ko

magar hum apni sharafat-e-nafs ki

giran-bariyon se majbur ho gae the

KHud apni fitrat se

is qadar dur ho gae the

ki dil ki aawaz sun na pae

lahu ki gardish bhi waqt ke sath

tham gai thi

hum us ke haq mein wo aabla the

jo phuTta hai na sukhta hai