aabnae

aañkh ke ābnā.e meñ

Duubā machherā na jaane

falak-tāz dhāre meñ

gaatī nahātī huī surḳh laḌkī kī jaañ

us machhere meñ hai

laḌkī ke gītoñ meñ

langar-andāz kashtī hai

lahroñ kī karvaT hai

sāhil kā phal hai

machhere kī taaza javānī hai

mastī bharā niilā paanī hai

laḌkī umañDtī huī vaqt kī dhaar hai

jis ke rele se

mahshar bapā kartī lahreñ nikaltī haiñ

laḌkī samundar hai

gahre samundar kī ġhhambīr ḳhāmoshī

paanī se uḌtī huī Dāreñ

chikne kināre

har ik chiiz laḌkī ke gītoñ ke andar hai

laḌkī parinda hai aabī parinda

samundar ke be-ant siine pe

uḌtā hai sadiyoñ se

sadiyoñ se lambī mu'ammar chaTānoñ se juḌtā hai

muḌtā hai vāpas

samundar ke be-ant phailāo kī samt

laḌkī koī mo'jiza hai

samundar meñ jūñhī utartī hai

paanī ko rangīn kartī hai

lahroñ kī chādar ko uupar uThātī hai

nīche se motī ke ambār laatī hai

motī uThāte hue giit gaatī hai

laḌkī ke gītoñ ke mā'nī

faqat us machhere pe raushan haiñ

jo aañkh ke ābnā.e meñ Duubā paḌā hai

aankh ke aabnae mein

Duba machhera na jaane

falak-taz dhaare mein

gati nahati hui surKH laDki ki jaan

us machhere mein hai

laDki ke giton mein

langar-andaz kashti hai

lahron ki karwaT hai

sahil ka phal hai

machhere ki taza jawani hai

masti bhara nila pani hai

laDki umanDti hui waqt ki dhaar hai

jis ke rele se

mahshar bapa karti lahren nikalti hain

laDki samundar hai

gahre samundar ki ghambir KHamoshi

pani se uDti hui Daren

chikne kinare

har ek chiz laDki ke giton ke andar hai

laDki parinda hai aabi parinda

samundar ke be-ant sine pe

uDta hai sadiyon se

sadiyon se lambi mu'ammar chaTanon se juDta hai

muDta hai wapas

samundar ke be-ant phailao ki samt

laDki koi mo'jiza hai

samundar mein junhi utarti hai

pani ko rangin karti hai

lahron ki chadar ko upar uThati hai

niche se moti ke ambar lati hai

moti uThate hue git gati hai

laDki ke giton ke ma'ni

faqat us machhere pe raushan hain

jo aankh ke aabnae mein Duba paDa hai