aadmi

jo chāñd par gayā hai so hai vo bhī aadmī

jo gap uḌā rahā hai so hai vo bhī aadmī

jo hañs hañsā rahā hai so hai vo bhī aadmī

jo jī jalā rahā hai so hai vo bhī aadmī

haiñ aadmī ke saare zamāne meñ rañg-rūp

haiñ aadmī hī chāñdnī aur aadmī hī dhuup

hai aadmī hazāroñ kā aur ek paa.ī kā

aadhā hai apnī maañ kā to aadhā hai daa.ī kā

pesha bhī aadmī ne sambhālā gadā.ī kā

da.avā bhī aadmī ne kiyā hai ḳhudā.ī kā

gorā bhī aadmī hai to kaalā bhī aadmī

buzdil bhī aadmī hai jiyālā bhī aadmī

jab aadmī ke dil ko churātā hai aadmī

siine se apne us ko lagātā hai aadmī

aur is tarah se umr baḌhātā hai aadmī

mushkil se is jahān se jaatā hai aadmī

jaatā kahāñ hai ḳhud vo pakaḌvāyā jaatā hai

ya.anī farishta bhej ke bulvāyā jaatā hai

Daalā hai aadmī ne har ik aadmī pe jaal

''hai aadmī bajā.e ḳhud ik mahshar-e-ḳhayāl''

niklā tamām umr kī koshish kā ye ma.aal

aayā thā rotā pīTtā jaatā hai ḳhasta-hāl

is par ye haal hai ki akaḌtā hai aadmī

ġhairoñ se aur apnoñ se laḌtā hai aadmī

ye aadmī laḌā.ī ko vietnam meñ gayā

vo korea gayā kabhī āsām meñ gayā

vo telaviv o qāhira o shaam meñ gayā

ye aadmī hī muttahid-aqvām meñ gayā

phir aadmī ko amn sikhātā hai aadmī

bhaiñsoñ ke aage biin bajātā hai aadmī

iblīs ko fareb sikhātā rahā hai vo

aur shobade hazār dikhātā rahā hai vo

aalam ko uñgliyoñ pe nachātā rahā hai vo

ham ko jazā sazā se Darātā rahā hai vo

dozaḳh se va.az kah ke bachātā hai aadmī

par ḳhud kabhī kabhī vahīñ jaatā hai aadmī

hai aadmī jo kartā hai sab sīna-zoriyāñ

kartā hai lūTne ke liye naf.a-ḳhoriyāñ

bhartā hai is bahāne se apnī tijoriyāñ

dushman ko bech khātā hai gandum kī boriyāñ

chīzoñ kī qīmatoñ ko baḌhātā hai aadmī

aur gāhakoñ ko ḳhuun rulātā hai aadmī

jo chand par gaya hai so hai wo bhi aadmi

jo gap uDa raha hai so hai wo bhi aadmi

jo hans hansa raha hai so hai wo bhi aadmi

jo ji jala raha hai so hai wo bhi aadmi

hain aadmi ke sare zamane mein rang-rup

hain aadmi hi chandni aur aadmi hi dhup

hai aadmi hazaron ka aur ek pai ka

aadha hai apni man ka to aadha hai dai ka

pesha bhi aadmi ne sambhaala gadai ka

dawa bhi aadmi ne kiya hai KHudai ka

gora bhi aadmi hai to kala bhi aadmi

buzdil bhi aadmi hai jiyala bhi aadmi

jab aadmi ke dil ko churaata hai aadmi

sine se apne us ko lagata hai aadmi

aur is tarah se umr baDhata hai aadmi

mushkil se is jahan se jata hai aadmi

jata kahan hai KHud wo pakaDwaya jata hai

yani farishta bhej ke bulwaya jata hai

Dala hai aadmi ne har ek aadmi pe jal

hai aadmi bajae KHud ek mahshar-e-KHayal

nikla tamam umr ki koshish ka ye maal

aaya tha rota piTta jata hai KHasta-haal

is par ye haal hai ki akaDta hai aadmi

ghairon se aur apnon se laDta hai aadmi

ye aadmi laDai ko wietnam mein gaya

wo korea gaya kabhi aasam mein gaya

wo telawiw o qahira o sham mein gaya

ye aadmi hi muttahid-aqwam mein gaya

phir aadmi ko amn sikhata hai aadmi

bhainson ke aage bin bajata hai aadmi

iblis ko fareb sikhata raha hai wo

aur shobade hazar dikhata raha hai wo

aalam ko ungliyon pe nachata raha hai wo

hum ko jaza saza se Daraata raha hai wo

dozaKH se waz kah ke bachata hai aadmi

par KHud kabhi kabhi wahin jata hai aadmi

hai aadmi jo karta hai sab sina-zoriyan

karta hai luTne ke liye nafa-KHoriyan

bharta hai is bahane se apni tijoriyan

dushman ko bech khata hai gandum ki boriyan

chizon ki qimaton ko baDhata hai aadmi

aur gahakon ko KHun rulata hai aadmi