آدمی

توصیف بے کنار کا حق دار آدمی

دنیائے شش جہات کا سردار آدمی

سچ پوچھئے اگر تو ہے دونوں جہان میں

تخلیق ذوالجلال کا شہکار آدمی

خونخوار آدمی کہیں غم خوار آدمی

دیں دار آدمی کہ گناہ گار آدمی

آدم کے دونوں بیٹوں کی صورت جہان میں

ہے آدمی سے برسر پیکار آدمی

نادار آدمی کوئی زردار آدمی

خرکار آدمی کوئی بیگار آدمی

ہے طرفہ اک تماشا پس آدمی سدا

پردے پہ زندگی کے اداکار آدمی

ظالم ہے آدمی کبھی مظلوم آدمی

عیار آدمی کبھی معصوم آدمی

الجھا ہوا ہے ایسا من و تو کے درمیاں

مسرور آدمی کبھی مغموم آدمی

ہے شاد آدمی کبھی ناشاد آدمی

ہے صید آدمی کبھی صیاد آدمی

ہے آدمی کے روپ میں بہروپ ہر طرف

حرص و ہوا کے دور میں برباد آدمی

مجبور آدمی کبھی منصور آدمی

آجر ہے آدمی کبھی مزدور آدمی

ہر لمحہ اک تضاد ہے اس کی سرشت میں

عاجز ہے آدمی کبھی مفرور آدمی

قدسی سے بھی بڑا ہے یہ ناچیز آدمی

محبوب کبریا ہے یہ ناچیز آدمی

ظلمت بدوش دہر میں دیکھو جو غور سے

تنویر بے بہا ہے یہ ناچیز آدمی

تصویر صد نگار ہے دنیا میں آدمی

پیغمبر بہار ہے دنیا میں آدمی

سچ پوچھیے تو وسعت انساں کی حد نہیں

اک بحر بے کنار ہے دنیا میں آدمی