aafaqi Dakiye

mere ghar ko aatī bal khātī pagDanDī kināre

ka.ī rang ke phuul khile hue haiñ

maiñ aate jaate

jin se ham-kalām hotī huuñ

ki aaj ke mashīnī daur meñ

vo mere āfāqī Dākiye haiñ

jin kī ḳhushbū meñ mere ḳhvāboñ kī ta.abīr pinhāñ hai

jin ke rangoñ meñ mere kuñvar mere kanhaiyā ke hone kā nishāñ nihāñ hai

maiñ har roz jin ke dāman meñ apnī taqdīr kī shatranj bichhātī huuñ

un ke mukh pe khile rang ko sidq-e-dil se

vaqt kā uglā mohrā gardāntī huuñ

mere phuul mere Dākiye

jo kabhī jāmunī rang oḌh kar

āmad-e-bahār kā mīThā giit bante haiñ

jo kabhī niile rang meñ gungunā kar

duur dishāoñ meñ riste malāl kī sadā bante haiñ

jo kabhī safed rang meñ hañs kar

merī be-sūd mohabbatoñ kā madfan bante haiñ

mujhe un phūloñ kī zabāñ kā ilm hai

maiñ rangoñ se achchhe se vāqif huuñ

ki maiñ vo zamīn-zādī huuñ

jis kī bhūrī āñkhoñ meñ sitāroñ kī raushnī

miTTī ke pardoñ se Dhakī paḌī hai

mere ghar ko aati bal khati pagDanDi kinare

kai rang ke phul khile hue hain

main aate jate

jin se ham-kalam hoti hun

ki aaj ke mashini daur mein

wo mere aafaqi Dakiye hain

jin ki KHushbu mein mere KHwabon ki tabir pinhan hai

jin ke rangon mein mere kunwar mere kanhaiya ke hone ka nishan nihan hai

main har roz jin ke daman mein apni taqdir ki shatranj bichhati hun

un ke mukh pe khile rang ko sidq-e-dil se

waqt ka ugla mohra gardanti hun

mere phul mere Dakiye

jo kabhi jamuni rang oDh kar

aamad-e-bahaar ka miTha git bante hain

jo kabhi nile rang mein gunguna kar

dur dishaon mein riste malal ki sada bante hain

jo kabhi safed rang mein hans kar

meri be-sud mohabbaton ka madfan bante hain

mujhe un phulon ki zaban ka ilm hai

main rangon se achchhe se waqif hun

ki main wo zamin-zadi hun

jis ki bhuri aankhon mein sitaron ki raushni

miTTi ke pardon se Dhaki paDi hai