aag

ab qalam meñ

ek rañgīñ itr bhar lo

tum hasīñ phūloñ ke shā.ir ho koī zālim na kah de

shola-e-ehsās ke kāġhaz pe kuchh likhne chalā thā

aur kāġhaz pahle hī ik raakh sā thā

baat vāzeh hī nahīñ hai

shā.ir-e-gul

dā.ere sab maslahat-bīnī ke ab mauhūm se haiñ

baat khul kar kah na paa.e tum

to bas zero rahoge

ab qalam meñ aag bhar lo

aag tum ko raakh kar dene se pahle soch legī

zinda rahne do ise

shāyad ye merī laaj rakh le

log ab tak aag ke ma.anī ġhalat samjhe hue haiñ

aag aañsū aag shabnam

aag aadam ke rabāb-e-avvalīñ kā giit

ab qalam mein

ek rangin itr bhar lo

tum hasin phulon ke shair ho koi zalim na kah de

shola-e-ehsas ke kaghaz pe kuchh likhne chala tha

aur kaghaz pahle hi ek rakh sa tha

baat wazeh hi nahin hai

shair-e-gul

daere sab maslahat-bini ke ab mauhum se hain

baat khul kar kah na pae tum

to bas zero rahoge

ab qalam mein aag bhar lo

aag tum ko rakh kar dene se pahle soch legi

zinda rahne do ise

shayad ye meri laj rakh le

log ab tak aag ke mani ghalat samjhe hue hain

aag aansu aag shabnam

aag aadam ke rabab-e-awwalin ka git