aagha-hashr kashmiri

bazm-e-ālam meñ vo kaifiyāt-e-rañg-o-bū nahīñ

raunaq-e-aivān-e-getī aaj shāyad tū nahīñ

aah kyā tū pur-sukūñ hai qabr kī āġhosh meñ

chain kyūñkar aa gayā is mahshar-e-ḳhāmosh meñ

sarmadī naġhmāt se ab dil ko taḌpā.egā kaun

ab sitāre āsmāñ se toḌ kar lā.egā kaun

majlisī la.anat par ab tanqīd farmā.egā kaun

aur use rañgīn pairā.e meñ samjhā.egā kaun

aah ab kis se suneñge ātishīñ naġhmāt ham

aah ab kis se kaheñge apne ehsāsāt ham

hind kī doshīza devī ko diyā saada libās

tere hī pur-kaif naġhmoñ ne bujhā.ī dil kī pyaas

maġhribī tahzīb meñ Duubā huā thā har javāñ

mashriqī atvār se bezār thā hindostāñ

tū ne apne dil kī chiñgārī se bhaḌkā.ī vo aag

naġhma-e-mashriq se dab kar rah gayā maġhrib kā raag

saaz terā ātishīñ āvāz tūfānī tirī

hashr tak yaad aa.egī vo hashr-sāmānī tirī

bazm-e-alam mein wo kaifiyat-e-rang-o-bu nahin

raunaq-e-aiwan-e-geti aaj shayad tu nahin

aah kya tu pur-sukun hai qabr ki aaghosh mein

chain kyunkar aa gaya is mahshar-e-KHamosh mein

sarmadi naghmat se ab dil ko taDpaega kaun

ab sitare aasman se toD kar laega kaun

majlisi lanat par ab tanqid farmaega kaun

aur use rangin pairae mein samjhaega kaun

aah ab kis se sunenge aatishin naghmat hum

aah ab kis se kahenge apne ehsasat hum

hind ki doshiza dewi ko diya sada libas

tere hi pur-kaif naghmon ne bujhai dil ki pyas

maghribi tahzib mein Duba hua tha har jawan

mashriqi atwar se bezar tha hindostan

tu ne apne dil ki chingari se bhaDkai wo aag

naghma-e-mashriq se dab kar rah gaya maghrib ka rag

saz tera aatishin aawaz tufani teri

hashr tak yaad aaegi wo hashr-samani teri