aagahi ka dukh

āgahī kā dukh tum kyā jaano

kis aziyyat se guzarnā paḌtā hai

jab is ke saañp

gale meñ lipaT jaate haiñ

aur bhīñchte haiñ

sāñseñ ruk jaatī haiñ

baar baar phunkārte aur Daste haiñ

sub.h-o-shām rāt-din

un kā zahr rag-o-pai meñ utar jaatā hai

mere lahū meñ sarāyat kartā hai

maiñ TūTtī phūTtī rahtī huuñ

kāñch kī tarah

ret kī tarah

khankhanātī huī miTTī kī tarah

merī nas nas se lahū bahtā hai

shaam hī se mere bistar par aasan jamā lete haiñ

mujhe sone nahīñ dete

karvaT karvaT mujhe Daste haiñ

lekin ye saañp maiñ ne ḳhud

apne lahū se paale haiñ

apne vajūd ke andar

'shakeb' 'sarvat' aur ‘sāra’ ne bhī paale the

unheñ bhī niiñd nahīñ aatī thī

āḳhir-e-kār vo rail kī paTrī par jā kar

mīThī niiñd so ga.e

shāyad ye

rail kī sīTiyoñ se bahut Darte haiñ

rail kī paTrī ko paar nahīñ kar paate

aagahi ka dukh tum kya jaano

kis aziyyat se guzarna paDta hai

jab is ke sanp

gale mein lipaT jate hain

aur bhinchte hain

sansen ruk jati hain

bar bar phunkarte aur Daste hain

subh-o-sham raat-din

un ka zahr rag-o-pai mein utar jata hai

mere lahu mein sarayat karta hai

main TuTti phuTti rahti hun

kanch ki tarah

ret ki tarah

khankhanati hui miTTi ki tarah

meri nas nas se lahu bahta hai

sham hi se mere bistar par aasan jama lete hain

mujhe sone nahin dete

karwaT karwaT mujhe Daste hain

lekin ye sanp main ne KHud

apne lahu se pale hain

apne wajud ke andar

'shakeb' 'sarwat' aur ‘sara’ ne bhi pale the

unhen bhi nind nahin aati thi

aaKHir-e-kar wo rail ki paTri par ja kar

miThi nind so gae

shayad ye

rail ki siTiyon se bahut Darte hain

rail ki paTri ko par nahin kar pate