aagahi

zindagī kyā hai raushnī ke sivā

raushnī kyā hai ik ḳhushī ke sivā

ye ḳhushī vādiyoñ kī chhāñv meñ

nāchtī hai har ek pattī par

chuum letī hai bādaloñ ke hisār

uḌtī phirtī hai sukh kī bastī par

mere dil meñ humak rahī hai abhī

ātishīñ rañg ye kiran hī to hai

aañkh meñ diip jal uThe hoñ jahāñ

ye ḳhushī ik hasīñ milan hī to hai

apne hone pe sharmsār na ho

ye ḳhushī tujh ko bhī bulā.egī

raat kitnī hī ghup añdherī ho

raat āḳhir guzar hī jā.egī

zindagī raushnī kī chāhat meñ

ik nayā azm le kar uTThegī

toḌ Dālegī zulmatoñ kī fasīl

ik na.ī sub.h le ke utregī

zindagī raushnī ke raste meñ

apnā sab kuchh luTāne aa.ī hai

apne sūraj kī aarzū le kar

in añdheroñ ko Dhāne aa.ī hai

kyā huā gar hameñ sahar na milī

ek ḳhvāhish to chhoḌ jā.eñge

aane vaalī havāoñ ke ruḳh par

āgahī kā diyā jalā.eñge

zindagi kya hai raushni ke siwa

raushni kya hai ek KHushi ke siwa

ye KHushi wadiyon ki chhanw mein

nachti hai har ek patti par

chum leti hai baadalon ke hisar

uDti phirti hai sukh ki basti par

mere dil mein humak rahi hai abhi

aatishin rang ye kiran hi to hai

aankh mein dip jal uThe hon jahan

ye KHushi ek hasin milan hi to hai

apne hone pe sharmsar na ho

ye KHushi tujh ko bhi bulaegi

raat kitni hi ghup andheri ho

raat aaKHir guzar hi jaegi

zindagi raushni ki chahat mein

ek naya azm le kar uTThegi

toD Dalegi zulmaton ki fasil

ek nai subh le ke utregi

zindagi raushni ke raste mein

apna sab kuchh luTane aai hai

apne suraj ki aarzu le kar

in andheron ko Dhane aai hai

kya hua gar hamein sahar na mili

ek KHwahish to chhoD jaenge

aane wali hawaon ke ruKH par

aagahi ka diya jalaenge