آہ ناتمام

شام غم اف زندگی تھی میری گھبرائی ہوئی

میری ہستی پر فضائے یاس تھی چھائی ہوئی

بڑھ رہی تھی ایک بے چینی دل ناشاد میں

بہہ رہے تھے اشک آنکھوں سے کسی کی یاد میں

یاد آتا تھا کوئی رہ رہ کے مجھ کو بار بار

ہو رہے تھے جس سے رخصت ہجر میں صبر و قرار

میری حالت کوئی اس دم دیکھنے والا نہ تھا

چرخ پر بکھرے ہوئے افسردہ تاروں کے سوا

یاد آتا جا رہا تھا مجھ کو کوئی زر نگار

جس پہ ہوتی ہے تصدق صحن گلشن کی بہار

لمحہ لمحہ میں لئے جاتا تھا اس کے نام کو

جس سے ہوتی تھی تسلی اس دل ناکام کو

کیا کہوں شاہدؔ کسی سے تھی یہ ایسی غم کی شام

دل میں سوز نامکمل لب پہ آہ ناتمام