aah-e-na-tamam

shām-e-ġham uf zindagī thī merī ghabrā.ī huī

merī hastī par fazā-e-yās thī chhā.ī huī

baḌh rahī thī ek bechainī dil-e-nāshād meñ

bah rahe the ashk āñkhoñ se kisī kī yaad meñ

yaad aatā thā koī rah rah ke mujh ko bār-bār

ho rahe the jis se ruḳhsat hijr meñ sabr-o-qarār

merī hālat koī us dam dekhne vaalā na thā

charḳh par bikhre hue afsurda tāroñ ke sivā

yaad aatā jā rahā thā mujh ko koī zar-nigār

jis pe hotī hai tasadduq sehn-e-gulshan kī bahār

lamha lamha maiñ liye jaatā thā us ke naam ko

jis se hotī thī tasallī is dil-e-nākām ko

kyā kahūñ 'shāhid' kisī se thī ye aisī ġham kī shaam

dil meñ soz-e-nā-mukammal lab pe āh-e-nā-tamām

sham-e-gham uf zindagi thi meri ghabrai hui

meri hasti par faza-e-yas thi chhai hui

baDh rahi thi ek bechaini dil-e-nashad mein

bah rahe the ashk aankhon se kisi ki yaad mein

yaad aata tha koi rah rah ke mujh ko bar-bar

ho rahe the jis se ruKHsat hijr mein sabr-o-qarar

meri haalat koi us dam dekhne wala na tha

charKH par bikhre hue afsurda taron ke siwa

yaad aata ja raha tha mujh ko koi zar-nigar

jis pe hoti hai tasadduq sehn-e-gulshan ki bahaar

lamha lamha main liye jata tha us ke nam ko

jis se hoti thi tasalli is dil-e-nakaam ko

kya kahun 'shahid' kisi se thi ye aisi gham ki sham

dil mein soz-e-na-mukammal lab pe aah-e-na-tamam