aah gokhale

kyoñ yaas ho na mujh ko bahbūd-e-hindiyāñ se

suntī huuñ gokhale bhī ruḳhsat hue jahāñ se

kab tak bañdhā rahegā tāñtā musībatoñ kā

kab tak najāt hogī is saḳht imtihāñ se

baḌhtī huī umīdeñ uThtī huī umangeñ

miTTī meñ mil ga.iiñ sab is marg-e-nā-gahāñ se

afsos mulk-bhar meñ ho ik charāġh vo bhī

bujh jaa.e jalte jalte soz-e-ġham-e-nihāñ se

maatā kī pahle sevā sehat kī fikr pīchhe

aisā supūt bhārat ab lā.egī kahāñ se

hubb-e-vatan hameñ bhī aur gokhle ko bhī thī

par thā vahāñ ta'alluq dil se yahāñ zabāñ se

ai kaash ho ye kalima phir hirz-e-jāñ hamārā

hindī haiñ ham vatan hai hindostāñ hamārā

kartī hai saaf ishāra tasvīr gokhle kī

pachhtā.e kī jinhoñ ne tahqīr gokhle kī

sargoshiyāñ karegī ik roz āsmāñ se

haañ haañ yahāñ adhūrī tanvīr gokhle kī

ta.alīm-e-ibtidā.ī ho kar rahegī lāzim

raushan karegī āñkheñ tanvīr gokhle kī

africa meñ na hogā farq-e-saped-o-asvad

lā.egī rang ḳhūnīñ taqrīr gokhle kī

hubb-e-vatan ko juzv-e-īmāñ kahā gayā hai

vaa.iz samajh ke kiijo takfīr gokhle kī

ai mo'tariz hisār-e-bātil ho laakh mohkam

kar legī par sadāqat tasḳhīr gokhle kī

mat aazmā ki haq ne girtoñ ko kaise thāmā

man jarrabalmujarrab hallat bihin-nadāma

kyon yas ho na mujh ko bahbud-e-hindiyan se

sunti hun gokhale bhi ruKHsat hue jahan se

kab tak bandha rahega tanta musibaton ka

kab tak najat hogi is saKHt imtihan se

baDhti hui umiden uThti hui umangen

miTTi mein mil gain sab is marg-e-na-gahan se

afsos mulk-bhar mein ho ek charagh wo bhi

bujh jae jalte jalte soz-e-gham-e-nihan se

mata ki pahle sewa sehat ki fikr pichhe

aisa suput bhaarat ab laegi kahan se

hubb-e-watan hamein bhi aur gokhle ko bhi thi

par tha wahan ta'alluq dil se yahan zaban se

ai kash ho ye kalima phir hirz-e-jaan hamara

hindi hain hum watan hai hindostan hamara

karti hai saf ishaara taswir gokhle ki

pachhtae ki jinhon ne tahqir gokhle ki

sargoshiyan karegi ek roz aasman se

han han yahan adhuri tanwir gokhle ki

talim-e-ibtidai ho kar rahegi lazim

raushan karegi aankhen tanwir gokhle ki

africa mein na hoga farq-e-saped-o-aswad

laegi rang KHunin taqrir gokhle ki

hubb-e-watan ko juzw-e-iman kaha gaya hai

waiz samajh ke kijo takfir gokhle ki

ai mo'tariz hisar-e-baatil ho lakh mohkam

kar legi par sadaqat tasKHir gokhle ki

mat aazma ki haq ne girton ko kaise thama

man jarrabalmujarrab hallat bihin-nadama