aahan ko bhi aaKHir zang lagta hai

irāda āhanī thā ye ki tum ko bhuul jā.eñge

tumhārā ḳhūb-rū paikar

khanakte qahqahe āvāz dilkash

zer-o-bam lahje kā vo zīrak nigāheñ

anā-parvar apollo ho koī maġhrūr yūnānī

vo āñkheñ be-ta.assur jo har ik jazba chhupā lene kī māhir thiiñ

bahut gambhīr ḳhāmoshī ko oḌhe

yuuñ ki jaise kurra-e-arzī pe koī devtā ġhalatī se aa jaa.e

magar merā vazīfa thā

faqat rāheñ tumhārī dekhte rahnā

tumheñ dekhā to ye jaanā

faqat ik shaḳhs kā ehsās kaise dil ke sahrā meñ

gul-e-lāla ke khil uThne kā zāmin hai

ye āñkheñ jugnūoñ kā diip āḳhir kaise bantī haiñ

shafaq gulgūñ kisī aariz pe kaise phail jaatī hai

ki dil kī dhaḌkaneñ kaise sabā-raftār hotī haiñ

vo har ik baat meñ tum se hī merā mashvara lenā

yuuñ jaise mamlikat meñ rabb-e-ka.aba kī

faqat tum hī davā saare maraz kī ho

yuuñ jaise rāh-gum-karda musāfir ke safar meñ rahnumā.ī ko qutub-tāra koī ubhre

kabhī mere savāloñ kī himāqat par

vo mub.ham muskurāhaT zer-e-lab jaise

shab-e-tārīk meñ bijlī koī

pal-bhar ko chhab apnī dikhā jaa.e

tumhārī ye karam-farmā.iyāñ ma.amūl thiiñ jin ko

mohabbat ke ufuq par jāvedāñ karne kī ḳhvāhish ik jasārat thī

ḳhatā sarzad huī ham se

irāda āhanī thā ye ki tum ko bhuul jā.eñge

magar ye bhuul baiThe ham

ki aahan ko bhī āḳhir zang lagtā hai

irada aahani tha ye ki tum ko bhul jaenge

tumhaara KHub-ru paikar

khanakte qahqahe aawaz dilkash

zer-o-bam lahje ka wo zirak nigahen

ana-parwar apollo ho koi maghrur yunani

wo aankhen be-tassur jo har ek jazba chhupa lene ki mahir thin

bahut gambhir KHamoshi ko oDhe

yun ki jaise kurra-e-arzi pe koi dewta ghalati se aa jae

magar mera wazifa tha

faqat rahen tumhaari dekhte rahna

tumhein dekha to ye jaana

faqat ek shaKHs ka ehsas kaise dil ke sahra mein

gul-e-lala ke khil uThne ka zamin hai

ye aankhen jugnuon ka dip aaKHir kaise banti hain

shafaq gulgun kisi aariz pe kaise phail jati hai

ki dil ki dhaDkanen kaise saba-raftar hoti hain

wo har ek baat mein tum se hi mera mashwara lena

yun jaise mamlikat mein rabb-e-kaba ki

faqat tum hi dawa sare maraz ki ho

yun jaise rah-gum-karda musafir ke safar mein rahnumai ko qutub-tara koi ubhre

kabhi mere sawalon ki himaqat par

wo mubham muskurahaT zer-e-lab jaise

shab-e-tarik mein bijli koi

pal-bhar ko chhab apni dikha jae

tumhaari ye karam-farmaiyan mamul thin jin ko

mohabbat ke ufuq par jawedan karne ki KHwahish ek jasarat thi

KHata sarzad hui hum se

irada aahani tha ye ki tum ko bhul jaenge

magar ye bhul baiThe hum

ki aahan ko bhi aaKHir zang lagta hai