aaina aur main

zamāne bhar meñ ā.īna sadāqat kī alāmat hai

magar meñ is kā munkir huuñ

bahut jhūTā hai ā.īna

kabhī vo dev-qāmat hastiyoñ ko ek dam baunā dikhātā hai

tilasmātī hai ā.īna

kabhī pasta-qadoñ kā qad bahut ūñchā dikhātā hai

bahut bahrūpiyā hai vo

koī farba ho to us ko bahut dublā dikhātā hai

bahut hī masḳhara hai vo

chalo jaane bhī do ki aa.ina insān kī fitrat meñ shāyad Dhal gayā hogā

magar kuchh sho.abda-bāzī kī had bhī hai

ye ā.īna to mujh se bhī hamesha makr kartā hai

jo merā haath ho sīdhā to vo ulTā dikhātā hai

agar ulTā dikhātā huuñ to phir sīdhā dikhātā hai

bahut jhūTā hai ā.īna

magar ā.īna-e-ayyām meñ takzīb-e-ā.īna kī haisiyyat bhalā kyā hai

ḳhudā jaane

magar tārīḳh kahtī hai

yahī takzīb-e-ā.īna, zamāne bhar ke shīshagar qabīle ke liye ḳhatrāt kā tasdīq-nāma hai

mirī tazrīb-e-paiham se ye ā.īnoñ ke saudāgar shikasta haiñ

shikasta kaifiyat meñ mujh se ye daryāft karte haiñ

ki āḳhir kaun ho tum jī

tumheñ in ā.inoñ se dushmanī kyuuñ hai

hamesha ā.inoñ kā muñh chiḌhāte ho, sadā taz.hīk karte ho

tum āḳhir chāhte kyā ho

to lo maiñ aaj ye elaan kartā huuñ

mire is ahd ke shīshagaro, saudāgaro sun lo!

suno, āgāh ho jaao

maiñ shā.er huuñ

maiñ ā.īne ko ā.īna dikhātā huuñ!

zamane bhar mein aaina sadaqat ki alamat hai

magar mein is ka munkir hun

bahut jhuTa hai aaina

kabhi wo dew-qamat hastiyon ko ek dam bauna dikhata hai

tilasmati hai aaina

kabhi pasta-qadon ka qad bahut uncha dikhata hai

bahut bahrupiya hai wo

koi farba ho to us ko bahut dubla dikhata hai

bahut hi masKHara hai wo

chalo jaane bhi do ki aaina insan ki fitrat mein shayad Dhal gaya hoga

magar kuchh shoabda-bazi ki had bhi hai

ye aaina to mujh se bhi hamesha makr karta hai

jo mera hath ho sidha to wo ulTa dikhata hai

agar ulTa dikhata hun to phir sidha dikhata hai

bahut jhuTa hai aaina

magar aaina-e-ayyam mein takzib-e-aina ki haisiyyat bhala kya hai

KHuda jaane

magar tariKH kahti hai

yahi takzib-e-aina, zamane bhar ke shishagar qabile ke liye KHatraat ka tasdiq-nama hai

meri tazrib-e-paiham se ye aainon ke saudagar shikasta hain

shikasta kaifiyat mein mujh se ye daryaft karte hain

ki aaKHir kaun ho tum ji

tumhein in aainon se dushmani kyun hai

hamesha aainon ka munh chiDhate ho, sada tazhik karte ho

tum aaKHir chahte kya ho

to lo main aaj ye elan karta hun

mere is ahd ke shishagaro, saudagaro sun lo!

suno, aagah ho jao

main shaer hun

main aaine ko aaina dikhata hun!