aaina

maiñ ne ik sapnā dekhā hai

raat kā sūraj apnī kaalī zulfeñ khole jaag rahā hai

shahr meñ sannāTā pasrā hai

chāñd kī ujlī chādar taane maiñ apne ghar meñ soyā huuñ

itne meñ ik shor hai uThtā

shab-ḳhūñ maarā shab-ḳhūñ maarā

dekho shaitāñ phir aa nikle

maiñ ne bhī sab apnī matā-e-zohd-o-taqvā sabr-o-qanā.at

aur a.amāl kī sonā chāñdī

ik ik kar ke ghar meñ dekhī

vo sab apnī jā pe nahīñ thiiñ

itne meñ ik shaḳhs ko dekhā

mere madd-e-muqābil thā vo

kamre meñ ye kaise aayā

soch ke jab hairān huā to

baḌh kar us ko chhūnā chāhā

lekin ye to ā.īna thā

main ne ek sapna dekha hai

raat ka suraj apni kali zulfen khole jag raha hai

shahr mein sannaTa pasra hai

chand ki ujli chadar tane main apne ghar mein soya hun

itne mein ek shor hai uThta

shab-KHun mara shab-KHun mara

dekho shaitan phir aa nikle

main ne bhi sab apni mata-e-zohd-o-taqwa sabr-o-qanaat

aur aamal ki sona chandi

ek ek kar ke ghar mein dekhi

wo sab apni ja pe nahin thin

itne mein ek shaKHs ko dekha

mere madd-e-muqabil tha wo

kamre mein ye kaise aaya

soch ke jab hairan hua to

baDh kar us ko chhuna chaha

lekin ye to aaina tha