aaina TuT gaya

ham ne

chāhā thā dikhānā kisī unvāñ lekin

aa.ina

TuuT gayā sang-zanoñ ke hāthoñ

chaḌhte sūraj kī tapish

aag kā dariyā jaise

phuul

murjhā.e hue

bikhre paḌe haiñ har-sū

bād-e-sarsar ke thapeḌoñ se gire hoñ jaise

har taraf sehn-e-chaman meñ hai

udāsī chhā.ī

daam

gulchīñ ke har ik samt bichhe hoñ jaise

chiil

kavvoñ ke havāle se patā chaltā hai

murda jismoñ kī mahak gor-e-ġharībāñ kā samāñ

qarya qarya

mujhe āseb-zada lagtā hai

koī saaya hai

ki rah rah ke sadā detā hai

kushta-e-zulm hai

ye āh-o-bukā kartā hai

nit-na.e rang se

har roz sitam sahtā hai

bastiyāñ

shahr-e-ḳhamoshāñ kā patā detī haiñ

shahr-e-mazlūm ko

ashkoñ se duā detī haiñ

shahr jaltā hī rahā yūñhī

to phir ḳhair nahīñ

ūñche mahloñ ko bhī

ye aag jalā Dālegī

qaisar-e-vaqt ko

qallāsh banā Dālegī

hai koī sham.a añdhere meñ

jalāne vaalā

maut ko

apne kaleje se lagāne vaalā

ham hī

tanhā haiñ sar-e-dār uThā.e sar ko

koī monis

na koī hamdam-o-nigarāñ apnā

vahshat-e-shauq meñ hai

chāk-garebāñ apnā

har qadam saath jahāñ vaqt kī sachchā.ī hai

haq-parastoñ kī ḳhudā-dād pazīrā.ī hai

zulmat-e-shab kī

siyāhī bhī utar jā.egī

jalva-e-sub.h se

har chiiz nikhar jā.egī

ham ne

chāhā thā dikhānā kisī unvāñ lekin

aa.ina

TuuT gayā sang-zanoñ ke hāthoñ

hum ne

chaha tha dikhana kisi unwan lekin

aaina

TuT gaya sang-zanon ke hathon

chaDhte suraj ki tapish

aag ka dariya jaise

phul

murjhae hue

bikhre paDe hain har-su

baad-e-sarsar ke thapeDon se gire hon jaise

har taraf sehn-e-chaman mein hai

udasi chhai

dam

gulchin ke har ek samt bichhe hon jaise

chil

kawwon ke hawale se pata chalta hai

murda jismon ki mahak gor-e-ghariban ka saman

qarya qarya

mujhe aaseb-zada lagta hai

koi saya hai

ki rah rah ke sada deta hai

kushta-e-zulm hai

ye aah-o-buka karta hai

nit-nae rang se

har roz sitam sahta hai

bastiyan

shahr-e-KHamoshan ka pata deti hain

shahr-e-mazlum ko

ashkon se dua deti hain

shahr jalta hi raha yunhi

to phir KHair nahin

unche mahlon ko bhi

ye aag jala Dalegi

qaisar-e-waqt ko

qallash bana Dalegi

hai koi shama andhere mein

jalane wala

maut ko

apne kaleje se lagane wala

hum hi

tanha hain sar-e-dar uThae sar ko

koi monis

na koi hamdam-o-nigaran apna

wahshat-e-shauq mein hai

chaak-gareban apna

har qadam sath jahan waqt ki sachchai hai

haq-paraston ki KHuda-dad pazirai hai

zulmat-e-shab ki

siyahi bhi utar jaegi

jalwa-e-subh se

har chiz nikhar jaegi

hum ne

chaha tha dikhana kisi unwan lekin

aaina

TuT gaya sang-zanon ke hathon