aaj

kār-farmā phir mirā zauq-e-ġhazal-ḳhvānī hai aaj

phir nafas kā sāz-e-garm-e-sho.ala-afshānī hai aaj

phir nigāh-e-shauq kī garmī hai aur rū-e-nigār

phir araq-ālūd ik kāfir kī peshānī hai aaj

phir mire lab par qasīde haiñ lab-o-ruḳhsār ke

phir kisī chehre pe tābānī sī tābānī hai aaj

husn is darja nashāt-e-husn meñ Duubā huā

añkhḌiyāñ be-ḳhud shamīm-e-zulf dīvānī hai aaj

larzish-e-lab meñ sharāb-o-sher kā tūfān hai

jumbish-e-mizhgāñ meñ afsūn-e-ġhazal-ḳhvānī hai aaj

vo nafas kī zamzama-sanjī nazar kī guftugū

sīna-e-ma.asūm meñ ik-tarfa tuġhyānī hai aaj

yaañ ba-īñ aalim ġhurūr-e-yūsufiyat bhī nahīñ

vaañ zuleḳhā.ī ba-azm-e-chāk-dāmānī hai aaj

vaañ ishāre haiñ bahak jaanā hī aish-e-hosh hai

hosh meñ rahnā yaqīnan saḳht nādānī hai aaj

kashmakash sī kashmakash meñ hai mazāq-e-āshiqī

kāmrāñ sī kāmrāñ har sa.ī-e-imkānī hai aaj

husn ke chehre pe hai nūr-e-sadāqat kī damak

ishq ke sar par kulāh-e-faḳhr-e-insānī hai aaj

shauq se mauqa-shanāsī kī tavaqqo bhī ġhalat

maiñ ne un kī shakl bhī mushkil se pahchānī hai aaj

kar-farma phir mera zauq-e-ghazal-KHwani hai aaj

phir nafas ka saz-e-garm-e-shoala-afshani hai aaj

phir nigah-e-shauq ki garmi hai aur ru-e-nigar

phir araq-alud ek kafir ki peshani hai aaj

phir mere lab par qaside hain lab-o-ruKHsar ke

phir kisi chehre pe tabani si tabani hai aaj

husn is darja nashat-e-husn mein Duba hua

ankhDiyan be-KHud shamim-e-zulf diwani hai aaj

larzish-e-lab mein sharab-o-sher ka tufan hai

jumbish-e-mizhgan mein afsun-e-ghazal-KHwani hai aaj

wo nafas ki zamzama-sanji nazar ki guftugu

sina-e-masum mein ik-tarfa tughyani hai aaj

yan ba-in aalim ghurur-e-yusufiyat bhi nahin

wan zuleKHai ba-azm-e-chaak-damani hai aaj

wan ishaare hain bahak jaana hi aish-e-hosh hai

hosh mein rahna yaqinan saKHt nadani hai aaj

kashmakash si kashmakash mein hai mazaq-e-ashiqi

kaamran si kaamran har sai-e-imkani hai aaj

husn ke chehre pe hai nur-e-sadaqat ki damak

ishq ke sar par kulah-e-faKHr-e-insani hai aaj

shauq se mauqa-shanasi ki tawaqqo bhi ghalat

main ne un ki shakl bhi mushkil se pahchani hai aaj