aaj aur kal

jab chhalakte haiñ zar-o-sīm ke gaate hue jaam

ek zahrāb sā māhaul meñ ghul jaatā hai

kaañp uThtā hai tahī-dast javānoñ kā ġhurūr

husn jab resham-o-kam-ḳhvāb meñ tal jaatā hai

maiñ ne dekhā hai ki aflās ke sahrāoñ meñ

qāfile azmat-e-ehsās ke ruk jaate haiñ

bekasī garm nigāhoñ ko jhulas detī hai

dil kisī sho.ala-e-zartāb se phuk jaate haiñ

jin usūloñ se ibārat hai mohabbat kī asaas

un usūloñ ko yahāñ toḌ diyā jaatā hai

apnī sahmī huī manzil ke tahaffuz ke liye

rahguzāroñ meñ dhuāñ chhoḌ diyā jaatā hai

maiñ ne jo raaz zamāne se chhupānā chāhā!

tū ne āfāq pe us raaz kā dar khol diyā

merī bāñhoñ ne jo dekhe the sunahre sapne

tū ne sone kī tarāzū meñ unheñ tol diyā

aaj aflās ne khaa.ī hai zar-o-sīm se maat

is meñ lekin tire chilloñ kā koī dosh nahīñ

ye taġhayyur usī māhaul kā parvarda hai

apnī be-rañg tabāhī kā jise hosh nahīñ

rahguzāroñ ke dhundalke to zarā chhaT jaa.eñ

apne talvoñ se ye kāñTe bhī nikal jā.eñge

aaj aur kal kī masāfat ko zarā tai kar leñ

vaqt ke saath irāde bhī badal jā.eñge

jab chhalakte hain zar-o-sim ke gate hue jam

ek zahrab sa mahaul mein ghul jata hai

kanp uThta hai tahi-dast jawanon ka ghurur

husn jab resham-o-kam-KHwab mein tal jata hai

main ne dekha hai ki aflas ke sahraon mein

qafile azmat-e-ehsas ke ruk jate hain

bekasi garm nigahon ko jhulas deti hai

dil kisi shoala-e-zartab se phuk jate hain

jin usulon se ibarat hai mohabbat ki asas

un usulon ko yahan toD diya jata hai

apni sahmi hui manzil ke tahaffuz ke liye

rahguzaron mein dhuan chhoD diya jata hai

main ne jo raaz zamane se chhupana chaha!

tu ne aafaq pe us raaz ka dar khol diya

meri banhon ne jo dekhe the sunahre sapne

tu ne sone ki taraazu mein unhen tol diya

aaj aflas ne khai hai zar-o-sim se mat

is mein lekin tere chillon ka koi dosh nahin

ye taghayyur usi mahaul ka parwarda hai

apni be-rang tabahi ka jise hosh nahin

rahguzaron ke dhundalke to zara chhaT jaen

apne talwon se ye kanTe bhi nikal jaenge

aaj aur kal ki masafat ko zara tai kar len

waqt ke sath irade bhi badal jaenge