aaj bhi

maiñ huuñ 'majāz' aaj bhī zamzama-e-sanj-o-naġhma-ḳhvāñ

shā.ir-e-mahfil-e-vafā mutrib-e-bazm-e-dil-barāñ

aaj bhī ḳhār-zār-e-ġham ḳhuld-e-barīñ mire liye

aaj bhī rah-guzār-e-ishq mere liye hai kahkashāñ

aaj bhī gā rahā huuñ maiñ sāz-e-junūñ liye hue

soz-e-nihāñ se aaj bhī rūh-e-tapāñ hai dil-tapāñ

aaj bhī zindagī mirī ġharq-e-sharāb-e-tund-o-tez

aaj bhī haath meñ mire jām-e-sharāb-e-arġhavāñ

aaj bhī hai rachī huī aaj bhī hai basī huī

mere nafas meñ ḳhuld kī nuz.hat-o-nik.hat-e-javāñ

aaj bhī nukta-chīñ huuñ maiñ ḳhalvatiyān-e-ḳhās kā

ḳhalvatiyān-e-ḳhās kā aaj bhī huuñ mizāj-dāñ

aaj bhī ashk-e-ḳhūñ mirā qashqa jabīn-e-nāz kā

aaj bhī ḳhāk-e-dil mirī surma-e-chashm-e-gul-ruḳhāñ

aaj bhī dil ko hai mire daulat-e-āgahī nasīb

aaj bhī hai nazar mirī arz-o-samāñ kī rāz-dāñ

aaj bhī hai junūñ mirā dair-o-haram pe ḳhanda-zan

aaj bhī mujh se bad-havās dair-o-haram ke pāsbāñ

aaj bhī saaz se mire garmī-e-bazm-e-sar-kashī

aaj bhī ātish-e-suḳhan shoa.la-fishāñ sharar-fishāñ

aaj bhī hai likhī huī surḳh hurūf meñ 'majāz'

daftar-e-shahr-e-yār meñ mere junūñ kī dāstāñ

main hun 'majaz' aaj bhi zamzama-e-sanj-o-naghma-KHwan

shair-e-mahfil-e-wafa mutrib-e-bazm-e-dil-baran

aaj bhi KHar-zar-e-gham KHuld-e-barin mere liye

aaj bhi rah-guzar-e-ishq mere liye hai kahkashan

aaj bhi ga raha hun main saz-e-junun liye hue

soz-e-nihan se aaj bhi ruh-e-tapan hai dil-tapan

aaj bhi zindagi meri gharq-e-sharab-e-tund-o-tez

aaj bhi hath mein mere jam-e-sharab-e-arghawan

aaj bhi hai rachi hui aaj bhi hai basi hui

mere nafas mein KHuld ki nuzhat-o-nikhat-e-jawan

aaj bhi nukta-chin hun main KHalwatiyan-e-KHas ka

KHalwatiyan-e-KHas ka aaj bhi hun mizaj-dan

aaj bhi ashk-e-KHun mera qashqa jabin-e-naz ka

aaj bhi KHak-e-dil meri surma-e-chashm-e-gul-ruKHan

aaj bhi dil ko hai mere daulat-e-agahi nasib

aaj bhi hai nazar meri arz-o-saman ki raaz-dan

aaj bhi hai junun mera dair-o-haram pe KHanda-zan

aaj bhi mujh se bad-hawas dair-o-haram ke pasban

aaj bhi saz se mere garmi-e-bazm-e-sar-kashi

aaj bhi aatish-e-suKHan shoala-fishan sharar-fishan

aaj bhi hai likhi hui surKH huruf mein 'majaz'

daftar-e-shahr-e-yar mein mere junun ki dastan