آج بھی

میں ہوں مجازؔ آج بھی زمزمہ سنج و نغمہ خواں

شاعر محفل وفا مطرب بزم دلبراں

آج بھی خار زار غم خلد بریں مرے لیے

آج بھی رہ گزار عشق میرے لیے ہے کہکشاں

آج بھی گا رہا ہوں میں ساز جنوں لیے ہوئے

سوز نہاں سے آج بھی روح تپاں ہے دل‌ تپاں

آج بھی زندگی مری غرق شراب تند و تیز

آج بھی ہاتھ میں مرے جام شراب ارغواں

آج بھی ہے رچی ہوئی آج بھی ہے بسی ہوئی

میرے نفس میں خلد کی نزہت و نکہت جواں

آج بھی نکتہ چیں ہوں میں خلوتیان خاص کا

خلوتیان خاص کا آج بھی ہوں مزاج داں

آج بھی اشک خوں مرا قشقہ جبین ناز کا

آج بھی خاک دل مری سرمۂ چشم گل رخاں

آج بھی دل کو ہے مرے دولت آگہی نصیب

آج بھی ہے نظر مری ارض و سماں کی رازداں

آج بھی ہے جنوں مرا دیر و حرم پہ خندہ زن

آج بھی مجھ سے بد حواس دیر و حرم کے پاسباں

آج بھی ساز سے مرے گرمئ بزم سرکشی

آج بھی آتش سخن شعلہ فشاں شرر فشاں

آج بھی ہے لکھی ہوئی سرخ حروف میں مجازؔ

دفتر شہر یار میں میرے جنوں کی داستاں