aaj-kal

har tamanna merī un kā mudda.ā hai āj-kal

zindagī hī zindagī kā aasrā hai āj-kal

zauq-e-ulfat be-niyāz-e-mā-sivā hai āj-kal

mujh ko un se un ko mujh se vāsta hai āj-kal

intihā-e-qurb-o-rabt-e-bāhamī ke bāvajūd

siine meñ dhaḌkan sī dil meñ dard sā hai āj-kal

yuuñ to aisā iztirāb aisī ḳhalish pahle bhī thī

lekin is aalam meñ ik turfa mazā hai āj-kal

ho rahā hai chashm-e-ḳhud-bīñ ko bhī irfān-e-junūñ

ḳhush-nigāhī meñ izāfa ho rahā hai āj-kal

apnī apnī had meñ chashm-o-dil kī mahviyyat na pūchh

zāhir-o-bātin kā jalva aa.ina hai āj-kal

imtiyāz-e-tālib-o-matlūb tak baaqī nahīñ

gardish-e-daurāñ se ye lamha judā hai āj-kal

kaash umr-e-rafta kī tārīḳh bhī palTe varaq

dil-navāzī sheva-e-ahl-e-jafā hai āj-kal

dil to do haiñ lekin ik zanjīr meñ jakḌe hue

husn bhī minjumla-e-ahl-e-vafā hai āj-kal

aql-o-dānish hai alag idrāk kī had se judā

shauq kī duniyā kā aalam dūsrā hai āj-kal

husn-o-ulfat donoñ ik manzil meñ aa kar kho ga.e

kyā ḳhabar hai kaun kis kā rahnumā hai āj-kal

is kā ai 'naḳhshab' ta'alluq hai latīf ehsās se

har kisī ko kyā ḳhabar kaisī fazā hai āj-kal

har tamanna meri un ka muddaa hai aaj-kal

zindagi hi zindagi ka aasra hai aaj-kal

zauq-e-ulfat be-niyaz-e-ma-siwa hai aaj-kal

mujh ko un se un ko mujh se wasta hai aaj-kal

intiha-e-qurb-o-rabt-e-bahami ke bawajud

sine mein dhaDkan si dil mein dard sa hai aaj-kal

yun to aisa iztirab aisi KHalish pahle bhi thi

lekin is aalam mein ek turfa maza hai aaj-kal

ho raha hai chashm-e-KHud-bin ko bhi irfan-e-junun

KHush-nigahi mein izafa ho raha hai aaj-kal

apni apni had mein chashm-o-dil ki mahwiyyat na puchh

zahir-o-baatin ka jalwa aaina hai aaj-kal

imtiyaz-e-talib-o-matlub tak baqi nahin

gardish-e-dauran se ye lamha juda hai aaj-kal

kash umr-e-rafta ki tariKH bhi palTe waraq

dil-nawazi shewa-e-ahl-e-jafa hai aaj-kal

dil to do hain lekin ek zanjir mein jakDe hue

husn bhi minjumla-e-ahl-e-wafa hai aaj-kal

aql-o-danish hai alag idrak ki had se juda

shauq ki duniya ka aalam dusra hai aaj-kal

husn-o-ulfat donon ek manzil mein aa kar kho gae

kya KHabar hai kaun kis ka rahnuma hai aaj-kal

is ka ai 'naKHshab' ta'alluq hai latif ehsas se

har kisi ko kya KHabar kaisi faza hai aaj-kal