aaj-kal

harf-e-haq dil se zabāñ tak lā rahā huuñ āj-kal

qissa-e-dār-o-rasan dohrā rahā huuñ āj-kal

halqa-e-zulf-e-sanam kī tīrgī se duur huuñ

zindagī ke pech-o-ḳham suljhā rahā huuñ āj-kal

shāḳh-e-gul par ab na pāoge mujhe tum naġhma-ḳhvāñ

āñdhiyoñ ke pālne meñ gā rahā huuñ āj-kal

ho rahegī qa.ar-e-dariyā kī haqīqat āshkār

mauj-o-tūfāñ ke thapeḌe khā rahā huuñ āj-kal

apnī duniyā-e-tag-o-dau apnī kisht-e-zīst par

abr-e-rahmat ban ke maiñ ḳhud chhā rahā huuñ āj-kal

mere jabr-o-qahr kī hamd-o-sanā ke baa'd ab

apne istiqlāl ke gun gā rahā huuñ āj-kal

vādī-e-ishq-o-junūñ meñ rah-ravān-e-shauq ko

ma.anī-e-harf-e-vafā samjhā rahā huuñ āj-kal

taaki anvār-e-suḳhan se jagmagā jaa.e jahāñ

sham.a kī mānind jaltā jā rahā huuñ āj-kal

ab ki yārān-e-vatan kī diid kā imkāñ nahīñ

'ashk' ġhurbat meñ sukūñ sā pā rahā huuñ āj-kal

harf-e-haq dil se zaban tak la raha hun aaj-kal

qissa-e-dar-o-rasan dohra raha hun aaj-kal

halqa-e-zulf-e-sanam ki tirgi se dur hun

zindagi ke pech-o-KHam suljha raha hun aaj-kal

shaKH-e-gul par ab na paoge mujhe tum naghma-KHwan

aandhiyon ke palne mein ga raha hun aaj-kal

ho rahegi qar-e-dariya ki haqiqat aashkar

mauj-o-tufan ke thapeDe kha raha hun aaj-kal

apni duniya-e-tag-o-dau apni kisht-e-zist par

abr-e-rahmat ban ke main KHud chha raha hun aaj-kal

mere jabr-o-qahr ki hamd-o-sana ke ba'd ab

apne istiqlal ke gun ga raha hun aaj-kal

wadi-e-ishq-o-junun mein rah-rawan-e-shauq ko

mani-e-harf-e-wafa samjha raha hun aaj-kal

taki anwar-e-suKHan se jagmaga jae jahan

shama ki manind jalta ja raha hun aaj-kal

ab ki yaran-e-watan ki did ka imkan nahin

'ashk' ghurbat mein sukun sa pa raha hun aaj-kal