آج کل

حرف حق دل سے زباں تک لا رہا ہوں آج کل

قصۂ دار و رسن دہرا رہا ہوں آج کل

حلقۂ زلف صنم کی تیرگی سے دور ہوں

زندگی کے پیچ و خم سلجھا رہا ہوں آج کل

شاخ گل پر اب نہ پاؤ گے مجھے تم نغمہ خواں

آندھیوں کے پالنے میں گا رہا ہوں آج کل

ہو رہے گی قعر دریا کی حقیقت آشکار

موج و طوفاں کے تھپیڑے کھا رہا ہوں آج کل

اپنی دنیائے تگ و دو اپنی کشت زیست پر

ابر رحمت بن کے میں خود چھا رہا ہوں آج کل

میرے جبر و قہر کی حمد و ثنا کے بعد اب

اپنے استقلال کے گن گا رہا ہوں آج کل

وادیٔ عشق و جنوں میں رہروان شوق کو

معنیٔ حرف وفا سمجھا رہا ہوں آج کل

تاکہ انوار سخن سے جگمگا جائے جہاں

شمع کی مانند جلتا جا رہا ہوں آج کل

اب کہ یاران وطن کی دید کا امکاں نہیں

اشکؔ غربت میں سکوں سا پا رہا ہوں آج کل