aaj ke munafiq

diloñ meñ kufr laboñ par himāyat-e-islām

chhurī baġhal meñ dabā.e hue haiñ muñh par raam

mukālima hai junūñ se to aql se bhī kalām

laboñ pe nāra-e-tahsīn zehn meñ dushnām

ye ḳhvāhishoñ ke pujārī ye maslahat ke ġhulām

fareb-o-makr ke qisse munāfiqat ke naam

kahīñ ba-nām-e-ḳhushāmad ye bik ga.e be-dām

kahīñ pe bolī thī ūñchī to ho ga.e nīlām

bahisht meñ bhī talab huur kā mile in.aam

zamīn par bhī murā.āt ke luTā.eñ jaam

har ik sadā pe hoñ hāzir har ek ke ḳhuddām

ġharaz ke bande mafādāt ke asīr-e-davām

ye bhejte haiñ faqat aaj ke liye paiġhām

jo fikr-e-fardā se kuchh hai inheñ to bas ye kaam

ho ḳhair-o-shar kī laḌā.ī kā jaane kyā anjām

na-jāne kis ko mile jiit kaun ho nākām

banī rahe jo sabhī se banā rahegā kaam

yazīd se bhī ta.alluq husain ko bhī salām

dilon mein kufr labon par himayat-e-islam

chhuri baghal mein dabae hue hain munh par ram

mukalima hai junun se to aql se bhi kalam

labon pe nara-e-tahsin zehn mein dushnam

ye KHwahishon ke pujari ye maslahat ke ghulam

fareb-o-makr ke qisse munafiqat ke nam

kahin ba-nam-e-KHushamad ye bik gae be-dam

kahin pe boli thi unchi to ho gae nilam

bahisht mein bhi talab hur ka mile inam

zamin par bhi muraat ke luTaen jam

har ek sada pe hon hazir har ek ke KHuddam

gharaz ke bande mafadat ke asir-e-dawam

ye bhejte hain faqat aaj ke liye paigham

jo fikr-e-farda se kuchh hai inhen to bas ye kaam

ho KHair-o-shar ki laDai ka jaane kya anjam

na-jaane kis ko mile jit kaun ho nakaam

bani rahe jo sabhi se bana rahega kaam

yazid se bhi talluq husain ko bhi salam