aaj ki raat

chāñdnī raat hai javānī par

dast-e-gardūñ meñ sāġhar-e-mahtāb

nuur ban ban ke chhan rahī hai sharāb

sāqī-e-āsmāñ piyāla-ba-dast

maiñ sharāb-e-surūr se sarmast

fikr-e-dozaḳh na zikr-e-jannat hai

maiñ huuñ aur terī pyārī sūrat hai

ras-bhare hoñT mad-bharī āñkheñ!

kaun fardā pe e'tibār kare

kaun jannat kā intizār kare

jaane kab maut kā payām aa.e

ye masarrat bhī ham se chhin jaa.e

dāman-e-aql chaak hone de

aaj ye qissa paak hone de

ġham ko nā-pā.edār kar deñ ham

maut ko sharmsār kar deñ ham

lab se lab yuuñ mileñ ki kho jaa.eñ

jazb ik dūsre meñ ho jaa.eñ

maiñ rahūñ aur na tū rahe bāqī!

kis qadar dil-nashīñ haiñ lab tere

bāda-e-ahmarīñ haiñ lab tere

tere hoñToñ kā ras nahīñ hai ye

āb-e-kausar hai añgbīñ hai ye

shahad ke ghūñT pī rahā huuñ maiñ

aaj kī raat jī rahā huuñ maiñ

aaj kī raat phir na ā.egī!

chandni raat hai jawani par

dast-e-gardun mein saghar-e-mahtab

nur ban ban ke chhan rahi hai sharab

saqi-e-asman piyala-ba-dast

main sharab-e-surur se sarmast

fikr-e-dozaKH na zikr-e-jannat hai

main hun aur teri pyari surat hai

ras-bhare honT mad-bhari aankhen!

kaun farda pe e'tibar kare

kaun jannat ka intizar kare

jaane kab maut ka payam aae

ye masarrat bhi hum se chhin jae

daman-e-aql chaak hone de

aaj ye qissa pak hone de

gham ko na-paedar kar den hum

maut ko sharmsar kar den hum

lab se lab yun milen ki kho jaen

jazb ek dusre mein ho jaen

main rahun aur na tu rahe baqi!

kis qadar dil-nashin hain lab tere

baada-e-ahmarin hain lab tere

tere honTon ka ras nahin hai ye

aab-e-kausar hai angbin hai ye

shahad ke ghunT pi raha hun main

aaj ki raat ji raha hun main

aaj ki raat phir na aaegi!