aaj phir jine ka ai dost irada kar tu

kyoñ ujāle haiñ nigāhoñ meñ tirī chubhne lage

kyoñ añdheroñ meñ mire dost tujhe kaif mile

kyoñ tirī ruuh kisī naġhme se shādāb na ho

kyoñ tabassum pe kalī ke bhī tirā dil na khile

naam lete hī vafā kā tū biphar uThtā hai

zikr iḳhlās kā karte hī bhaḌak jaa.e tū

kyoñ har ik vā'de pe hotā hai gumāñ bol tujhe

kyoñ hai iqrār se aatī tujhe inkār kī bū

baat chhiḌtī hai agar nargisī āñkhoñ kī kabhī

sard sī aah nikal aatī hai siine se tire

uTh ke chup-chāp chalā jaatā hai mahfil se tū

dost hote haiñ pareshān qarīne se tire

kyoñ ye duniyā tujhe be-sūd nazar aatī hai

kyoñ kisī chiiz kī chāhat hai na hasrat hai tujhe

kyoñ tabīboñ ko nahīñ paas phaTakne detā

ġhamgusāroñ se batā kis liye nafrat hai tujhe

mausam-e-gul to ka.ī baar hai aa aa ke gayā

ek muddat se tire chehre pe rā’nā.ī nahīñ

gosha-gosha hai khilā aaj bhī gulshan kā magar

tere dil ke kisī gosha meñ bahār aa.ī nahīñ

bevafā.ī ne kisī kī hai dil aisā toḌā

tujh ko dariyā bhī sarāboñ sā nazar aatā hai

har hasīñ chiiz se nāhaq tujhe Dar lagtā hai

duudh kā jaise jalā chhāchh se ghabrātā hai

dil ko bezār na kar ik do havādis ke sabab

ziist meñ aur havādis bhī guzarne haiñ abhī

dil kā ujḌā hai agar baaġh to māyūs na ho

phuul murjhāne bhī haiñ aur bhī khilne haiñ abhī

bevafā koī jo niklā to ḳhatā kyā terī

be-sabab ḳhud ko na is darja sazā de ab to

yaad kar ke use hāsil tujhe kyā hogā batā

jo tujhe bhuul gayā us ko bhulā de ab to

uTh na.ī paud lagāne kā hai mausam aayā

phuul ujḌe hue gulshan meñ khilā de tū na.e

kab se betāb hai duniyā tire naġhmoñ ke liye

uTh ke sāzoñ ko sajā giit sunā de tū na.e

aaj phir jiine kā ai dost irāda kar tū

phir na rūThegā kabhī ziist se vā'da kar tū

kyon ujale hain nigahon mein teri chubhne lage

kyon andheron mein mere dost tujhe kaif mile

kyon teri ruh kisi naghme se shadab na ho

kyon tabassum pe kali ke bhi tera dil na khile

nam lete hi wafa ka tu biphar uThta hai

zikr iKHlas ka karte hi bhaDak jae tu

kyon har ek wa'de pe hota hai guman bol tujhe

kyon hai iqrar se aati tujhe inkar ki bu

baat chhiDti hai agar nargisi aankhon ki kabhi

sard si aah nikal aati hai sine se tere

uTh ke chup-chap chala jata hai mahfil se tu

dost hote hain pareshan qarine se tere

kyon ye duniya tujhe be-sud nazar aati hai

kyon kisi chiz ki chahat hai na hasrat hai tujhe

kyon tabibon ko nahin pas phaTakne deta

ghamgusaron se bata kis liye nafrat hai tujhe

mausam-e-gul to kai bar hai aa aa ke gaya

ek muddat se tere chehre pe ra’nai nahin

gosha-gosha hai khila aaj bhi gulshan ka magar

tere dil ke kisi gosha mein bahaar aai nahin

bewafai ne kisi ki hai dil aisa toDa

tujh ko dariya bhi sarabon sa nazar aata hai

har hasin chiz se nahaq tujhe Dar lagta hai

dudh ka jaise jala chhachh se ghabraata hai

dil ko bezar na kar ek do hawadis ke sabab

zist mein aur hawadis bhi guzarne hain abhi

dil ka ujDa hai agar bagh to mayus na ho

phul murjhane bhi hain aur bhi khilne hain abhi

bewafa koi jo nikla to KHata kya teri

be-sabab KHud ko na is darja saza de ab to

yaad kar ke use hasil tujhe kya hoga bata

jo tujhe bhul gaya us ko bhula de ab to

uTh nai paud lagane ka hai mausam aaya

phul ujDe hue gulshan mein khila de tu nae

kab se betab hai duniya tere naghmon ke liye

uTh ke sazon ko saja git suna de tu nae

aaj phir jine ka ai dost irada kar tu

phir na ruThega kabhi zist se wa'da kar tu