aaj phir

mujhe

aaj phir vo nazm shiddat se yaad aa.ī

jo maiñ ne barsoñ pahle

ek ḳhvāb ke bikhar jaane par kahī thī

vaise maiñ ne arse se ḳhvāb dekhnā band kar diyā thā

ya.anī sarāboñ ke pīchhe bhāgnā chhoḌ diyā thā

magar ḳhvāb kab pīchhā chhoḌte haiñ

udhar phir kuchh dinoñ se ek ḳhvāb āñkhoñ meñ rahā

jis ke ḳhūbsūrat rañg-mahal ke tāne-bāne

tamām mumkin pahluoñ par kase ga.e

ummīd ne bhī piiTh thapthapā.ī thī

ka.ī taraf se sāzgār havāoñ kā bhī ehsās huā thā

shāyad ye merī ḳhush-fahmī thī

aur aaj jab vo ḳhvāb bhī bikhar gayā

to mujhe barsoñ pahle kahī huī vo nazm yaad aa.ī

jo ek aise hī ḳhvāb kī shikast par kahī ga.ī thī

mujhe ḳhvāb nahīñ dekhnā chāhiye

yā phir is haqīqat se aañkh milā lenā chāhiye

ki agar ḳhvāb dekhnā hai

aur un kī takmīl kī bhī aarzū hai

to vo sab kuchh karnā hogā

jo āj-kal

ḳhvāboñ ko sākār karne ke liye kiyā jaatā hai

mujhe

aaj phir wo nazm shiddat se yaad aai

jo main ne barson pahle

ek KHwab ke bikhar jaane par kahi thi

waise main ne arse se KHwab dekhna band kar diya tha

yani sarabon ke pichhe bhagna chhoD diya tha

magar KHwab kab pichha chhoDte hain

udhar phir kuchh dinon se ek KHwab aankhon mein raha

jis ke KHubsurat rang-mahal ke tane-bane

tamam mumkin pahluon par kase gae

ummid ne bhi piTh thapthapai thi

kai taraf se sazgar hawaon ka bhi ehsas hua tha

shayad ye meri KHush-fahmi thi

aur aaj jab wo KHwab bhi bikhar gaya

to mujhe barson pahle kahi hui wo nazm yaad aai

jo ek aise hi KHwab ki shikast par kahi gai thi

mujhe KHwab nahin dekhna chahiye

ya phir is haqiqat se aankh mila lena chahiye

ki agar KHwab dekhna hai

aur un ki takmil ki bhi aarzu hai

to wo sab kuchh karna hoga

jo aaj-kal

KHwabon ko sakar karne ke liye kiya jata hai