aaj phir se mausam badla hai

aaj phir se vo yaad aayā hai

un lamhoñ kā lams hāthoñ meñ baaqī hai

ḳhizāñ sard mausam kī ridā oḌhe

bhaTakne lagī hai phir se

yaad hai vo sab mujh ko ab bhī

isī tarah milte-julte mausam meñ

samundar kināre lahreñ jab uchhaltī kūdtī

pairoñ pe dam toḌtī thiiñ

mere zehn ke ik ik goshe meñ

yādeñ abhī bhī raqs kartī haiñ

be-ḳhudī meñ ab bhī muskurāhaT

hoñToñ pe machalne lagtī hai

falak par sitāroñ ke jhurmuT meñ

duur ufaq par chāñd jab chamaktā thā

tab jaltī bujhtī raushnī meñ ham

ik dūsre kā chehra takte rahte the

havā.eñ aa kar yuuñ gudgudātī thiiñ

hañste hañste ka.ī baar sāñseñ

rukne lagtī thiiñ

aaj phir se is mausam meñ

vo jhiil sī do āñkheñ

phir se yaad aa.ī haiñ

jin meñ ajab sī ik ḳhāmoshī

tairtī rahtī thī suno aa kar bhī

phir se zard patte shor karte haiñ

phūloñ ke bain sune haiñ maiñ ne

kahte haiñ sab mujh se

bad-gumānī ho jis dil meñ

mohabbat ho hī nahīñ saktī

maiñ khaḌī huuñ jahāñ

vahāñ ḳhāmoshiyāñ aaj bhī bāteñ kartī haiñ

aaj phir se mausam badlā hai

aaj phir se vo yaad aayā hai

aaj phir se wo yaad aaya hai

un lamhon ka lams hathon mein baqi hai

KHizan sard mausam ki rida oDhe

bhaTakne lagi hai phir se

yaad hai wo sab mujh ko ab bhi

isi tarah milte-julte mausam mein

samundar kinare lahren jab uchhalti kudti

pairon pe dam toDti thin

mere zehn ke ek ek goshe mein

yaaden abhi bhi raqs karti hain

be-KHudi mein ab bhi muskurahaT

honTon pe machalne lagti hai

falak par sitaron ke jhurmuT mein

dur ufaq par chand jab chamakta tha

tab jalti bujhti raushni mein hum

ek dusre ka chehra takte rahte the

hawaen aa kar yun gudgudati thin

hanste hanste kai bar sansen

rukne lagti thin

aaj phir se is mausam mein

wo jhil si do aankhen

phir se yaad aai hain

jin mein ajab si ek KHamoshi

tairti rahti thi suno aa kar bhi

phir se zard patte shor karte hain

phulon ke bain sune hain main ne

kahte hain sab mujh se

bad-gumani ho jis dil mein

mohabbat ho hi nahin sakti

main khaDi hun jahan

wahan KHamoshiyan aaj bhi baaten karti hain

aaj phir se mausam badla hai

aaj phir se wo yaad aaya hai