aaj phir ye kah raha hun

aaj phir ye kah rahā huuñ

yā mujhe apnāo yā merī kalā meñ Duub jaao

yā to ik patthar bano yā phuul ban kar muskurāo

maiñ tumhārī ḳhvāhishoñ ke saath sab kuchh sah rahā huuñ

aaj phir ye kah rahā huuñ

zindagī ik fan hai, fan maayā hai, maayā ek jaal

merā fan baḳhshegā tum ko zāhirī husn-o-jamāl

jo bhī chāhogī, milegā,

phuul jīvan kā khilegā

taaj chāho taaj de duuñ yā ajantā maañg dekho

jis tarah bhī dil kahe, merī kalā kā svāñg dekho

jo bhī mere fan se māñgogī, tumheñ mil jā.egā vo

rañg jo bhī dhyān meñ lāogī tum, muskā.egā vo

haañ, magar phir kah rahā huuñ

jab ye sab kuchh pā chukogī, ek daulat kho bhī dogī

mujh se nafrat hai magar ye husn-e-nafrat kho bhī dogī

sab rahegā

maiñ na hūñgā

aur tum merī kalā ke makr se ghabrā uThogī,

biich sāgar ro paḌogī ḳhud-baḳhud chillā uThogī

ek sāgar kī taraf ab maiñ bhī shāyad bah rahā huuñ

aaj phir ye kah rahā huuñ.....

aaj phir ye kah raha hun

ya mujhe apnao ya meri kala mein Dub jao

ya to ek patthar bano ya phul ban kar muskurao

main tumhaari KHwahishon ke sath sab kuchh sah raha hun

aaj phir ye kah raha hun

zindagi ek fan hai, fan maya hai, maya ek jal

mera fan baKHshega tum ko zahiri husn-o-jamal

jo bhi chahogi, milega,

phul jiwan ka khilega

taj chaho taj de dun ya ajanta mang dekho

jis tarah bhi dil kahe, meri kala ka swang dekho

jo bhi mere fan se mangogi, tumhein mil jaega wo

rang jo bhi dhyan mein laogi tum, muskaega wo

han, magar phir kah raha hun

jab ye sab kuchh pa chukogi, ek daulat kho bhi dogi

mujh se nafrat hai magar ye husn-e-nafrat kho bhi dogi

sab rahega

main na hunga

aur tum meri kala ke makr se ghabra uThogi,

bich sagar ro paDogi KHud-baKHud chilla uThogi

ek sagar ki taraf ab main bhi shayad bah raha hun

aaj phir ye kah raha hun