aaj tum aise hanse

aaj tum aise hañse

jaise koī āzād kar de saikḌoñ qaidī parinde

shor karte āsmāñ kī samt

yā bārish samundar par gire raftār meñ

yā dhuup khil jaa.e bharī barsāt meñ

tum guuñj ho ḳhushiyoñ ke tyauhāroñ kī

jo ham bholpan meñ apne bachpan ke safar meñ bhuul baiThe haiñ

tumheñ kis ne kahā

itnā hañso ki baal khul jaa.eñ

tumheñ kis ne kahā

ye sādgī kā zā.iqa tajvīz kar lo

kin bahādur rāstoñ par tum ne

apne naam kī mohreñ lagā.ī haiñ

tumheñ ye dhuup kā zevar september kī nishānī hai

september mere hoñToñ merī āñkhoñ meñ samāyā hai

september aa chukā hai mere dil meñ

aur mere jism ke āhañg meñ tabdīl hotā jā rahā hai

tum hañsī meñ giit hañstī jā rahī ho

kitnā mushkil hai hañsī kā giit meñ tabdīl ho jaanā

bahut mushkil

magar aise bahādur rāstoñ par sirf āzādī

hañsī ke giit

aur tere khule bāloñ meñ

purvā.ī chalegī

der tak aur duur tak

aaj tum aise hanse

jaise koi aazad kar de saikDon qaidi parinde

shor karte aasman ki samt

ya barish samundar par gire raftar mein

ya dhup khil jae bhari barsat mein

tum gunj ho KHushiyon ke tyauhaaron ki

jo hum bholpan mein apne bachpan ke safar mein bhul baiThe hain

tumhein kis ne kaha

itna hanso ki baal khul jaen

tumhein kis ne kaha

ye sadgi ka zaiqa tajwiz kar lo

kin bahadur raston par tum ne

apne nam ki mohren lagai hain

tumhein ye dhup ka zewar september ki nishani hai

september mere honTon meri aankhon mein samaya hai

september aa chuka hai mere dil mein

aur mere jism ke aahang mein tabdil hota ja raha hai

tum hansi mein git hansti ja rahi ho

kitna mushkil hai hansi ka git mein tabdil ho jaana

bahut mushkil

magar aise bahadur raston par sirf aazadi

hansi ke git

aur tere khule baalon mein

purwai chalegi

der tak aur dur tak