aaKHir-e-shab ke mehman

phir raat kī lāñbī palkoñ par

taḳhayyul ke motī Dhalte haiñ

phir vaqt kā afsūñ jaagā hai

ḳhushiyoñ ke ḳhazāne luTte haiñ

aur dil ke ziyāfat-ḳhāne ke

har goshe meñ sham.eñ jaltī haiñ

phūloñ se sajī haiñ mehrābeñ

ḳhushiyoñ kī dahaktī minqal se

tanvīr ke haale bante haiñ

ḳhvābīda darīche khulte haiñ

darvāzoñ ke parde hilte haiñ

mehmānoñ ke qadmoñ kī aahaT

har samt sunā.ī detī hai

is mahfil-e-husn-o-ḳhūbī meñ

maiñ un se muqābil hotī huuñ

ye haath jo mere haath meñ haiñ

phūloñ se ziyāda nāzuk haiñ

in zulfoñ ke umDe yā dil meñ

mahtāb sā chehra raushan hai

taslīm ko sar jhuktā hai koī

yā shāḳh havā se lachkī hai

chāñdī ke kaTore bajte haiñ

yā us ke laboñ par jumbish hai

in āñkhoñ ne mujh ko dekhā hai

yā TuuT ke taare barse haiñ

ye raat jo mere mehmānoñ kā

is tarah svāgat kartī hai

is raat ke phaile dāman par

maiñ shukr ke sajde kartī huuñ

phir raat ki lanbi palkon par

taKHayyul ke moti Dhalte hain

phir waqt ka afsun jaga hai

KHushiyon ke KHazane luTte hain

aur dil ke ziyafat-KHane ke

har goshe mein shamen jalti hain

phulon se saji hain mehraben

KHushiyon ki dahakti minqal se

tanwir ke haale bante hain

KHwabida dariche khulte hain

darwazon ke parde hilte hain

mehmanon ke qadmon ki aahaT

har samt sunai deti hai

is mahfil-e-husn-o-KHubi mein

main un se muqabil hoti hun

ye hath jo mere hath mein hain

phulon se ziyaada nazuk hain

in zulfon ke umDe ya dil mein

mahtab sa chehra raushan hai

taslim ko sar jhukta hai koi

ya shaKH hawa se lachki hai

chandi ke kaTore bajte hain

ya us ke labon par jumbish hai

in aankhon ne mujh ko dekha hai

ya TuT ke tare barse hain

ye raat jo mere mehmanon ka

is tarah swagat karti hai

is raat ke phaile daman par

main shukr ke sajde karti hun