aaKHir main kis jaisa hun

merī ammī kahtī haiñ

merā beTā mujh sā hai

abbū kahte haiñ ki maiñ

bilkul un hī jaisā huuñ

koī mujh ko batlā.e

thoḌā sā ye samjhā.e

kyā maiñ ammī jaisā huuñ

yā maiñ abbū jaisā huuñ

abbū itne lambe haiñ

aur maiñ qad meñ chhoTā huuñ

ammī merī dublī sī

maiñ to thoḌā moTā huuñ

abbū sā na ammī sā

āḳhir maiñ kis jaisā huuñ

kyā maiñ ammī jaisā huuñ

yā maiñ abbū jaisā huuñ

abbū thoḌe ganje haiñ

ammī kī lambī choTī

merā sar ganjā bhī nahīñ

na is pe lambī choTī

donoñ jaise baal nahīñ

phir maiñ dikhtā kaisā huuñ

kyā maiñ ammī jaisā huuñ

yā maiñ abbū jaisā huuñ

abbū ġhussa karte haiñ

mujh ko sahnā paḌtā hai

ammī DaañT pilā.eñ to

chup hī rahnā paḌtā hai

chup maiñ rahtā huuñ kyūñki

achchhe bachchoñ jaisā huuñ

kyā maiñ ammī jaisā huuñ

yā maiñ abbū jaisā huuñ

ammī jab ḳhush hotī haiñ

kahtī haiñ merā chandā

abbū kahte haiñ ki maiñ

ek sitāre jaisā huuñ

kyā maiñ chandā jaisā huuñ

yā maiñ taare jaisā huuñ

kyā maiñ ammī jaisā huuñ

yā maiñ abbū jaisā huuñ

abbū jab ghar aate haiñ

paanī le kar aatā huuñ

ammī ko saarī chīzeñ

lā lā kar pakḌātā huuñ

donoñ hī ke kāmoñ meñ

thoḌī madad karātā huuñ

baḌe baḌe paudoñ ke biich

nanhe phūloñ jaisā huuñ

haañ maiñ samajh gayā ḳhud hī

āḳhir maiñ kis jaisā huuñ

kuchh kuchh ammī jaisā huuñ

kuchh kuchh abbū jaisā huuñ

apne ghar kī ḳhushbū huuñ

maiñ to donoñ jaisā huuñ

meri ammi kahti hain

mera beTa mujh sa hai

abbu kahte hain ki main

bilkul un hi jaisa hun

koi mujh ko batlae

thoDa sa ye samjhae

kya main ammi jaisa hun

ya main abbu jaisa hun

abbu itne lambe hain

aur main qad mein chhoTa hun

ammi meri dubli si

main to thoDa moTa hun

abbu sa na ammi sa

aaKHir main kis jaisa hun

kya main ammi jaisa hun

ya main abbu jaisa hun

abbu thoDe ganje hain

ammi ki lambi choTi

mera sar ganja bhi nahin

na is pe lambi choTi

donon jaise baal nahin

phir main dikhta kaisa hun

kya main ammi jaisa hun

ya main abbu jaisa hun

abbu ghussa karte hain

mujh ko sahna paDta hai

ammi DanT pilaen to

chup hi rahna paDta hai

chup main rahta hun kyunki

achchhe bachchon jaisa hun

kya main ammi jaisa hun

ya main abbu jaisa hun

ammi jab KHush hoti hain

kahti hain mera chanda

abbu kahte hain ki main

ek sitare jaisa hun

kya main chanda jaisa hun

ya main tare jaisa hun

kya main ammi jaisa hun

ya main abbu jaisa hun

abbu jab ghar aate hain

pani le kar aata hun

ammi ko sari chizen

la la kar pakData hun

donon hi ke kaamon mein

thoDi madad karaata hun

baDe baDe paudon ke bich

nanhe phulon jaisa hun

han main samajh gaya KHud hi

aaKHir main kis jaisa hun

kuchh kuchh ammi jaisa hun

kuchh kuchh abbu jaisa hun

apne ghar ki KHushbu hun

main to donon jaisa hun