aaKHiri darwaza band hone se pahle pahle

vāpsī kā faisla kar hī liyā hai to

gum-sum kyoñ baiThī ho

tumheñ to ḳhush honā chāhiye

vāpsī kā ek dar abhī khulā hai

tum jāntī nahīñ ho

agar vāpsī ke sabhī darvāze band ho jaa.eñ to

raat pairoñ meñ ghuñghrū bāñdhe

itnā bhaTkātī hai

ki vāpas lauT aane par bhī

ghar nahīñ miltā

sirf surma.ī sannāTe

āñkhoñ se nikalte haiñ

muntazir suunī qabroñ kī sūkhī miTTī ko

tar kar jaate haiñ

aise meñ dukh agar battiyāñ ban kar

sulag uTTheñ

saarā manzar dhuñdlā jaa.e

titliyāñ uḌnā chiḌiyāñ chahchahānā

jugnū chamaknā bhuul jaa.eñ

aur terī aur koyal kī kuuk huuk meñ badal jaa.e

is se pahle ki

ektāre kī dhun par

koī mātamī giit gaa.e

vāpas lauT jaao

āḳhirī darvāza band hone se pahle pahle

wapsi ka faisla kar hi liya hai to

gum-sum kyon baiThi ho

tumhein to KHush hona chahiye

wapsi ka ek dar abhi khula hai

tum jaanti nahin ho

agar wapsi ke sabhi darwaze band ho jaen to

raat pairon mein ghunghru bandhe

itna bhaTkati hai

ki wapas lauT aane par bhi

ghar nahin milta

sirf surmai sannaTe

aankhon se nikalte hain

muntazir suni qabron ki sukhi miTTi ko

tar kar jate hain

aise mein dukh agar battiyan ban kar

sulag uTThen

sara manzar dhundla jae

titliyan uDna chiDiyan chahchahana

jugnu chamakna bhul jaen

aur teri aur koyal ki kuk huk mein badal jae

is se pahle ki

ektare ki dhun par

koi matami git gae

wapas lauT jao

aaKHiri darwaza band hone se pahle pahle